Etyi pakala katutu, Ohamba Nambukondonosole alingi otyilolo tyimwe otyinene tyo oolu. Etyipake pomphangu itiwa Dura aihana ovanthu ovanyingi okukutikinya-mo Sadrake na Mesake na Abedeneku, opo vafende otyilolo otyo. Ohamba aitumu okuti: ‘Tyina muameivi otyiimbo, amuho ikilei konongolo komutwe wo tyilolo! Omunthu uhemetyilingi mayumbwa mofolono yotupia. Okuti ova Hebreu ava vetatu mavafende otyilolo otyo, ine mavatualako okufenda vala ku Jeova?’

Ohamba aitumu okuhika otyiimbo. Etyi vetyiiva ovanthu aveho avaikila konongolo okufenda otyilolo, mahi Sadrake na Mesake na Abedeneku avehetyilingi. Etyi vamwe vetyimona avakapopila Ohamba okuti: ‘Ova Hebreu vetatu vaanya okufenda otyilolo tyove.’ Nambukondonosole atumu vakapolwe iya evepopila okuti: ‘Mandyimuavela vala otyikando tyike opo mufende otyilolo. Inkha kamutyilingi mandyimuyumbu mofolono yotupia. Iya petupu huku nawike upondola okumuyovola.’ Avakumbulula okuti: ‘Onthue katuesukisile vali okuitwa. Huku yetu metuyovola. Inkha Huku yetu ketuyovola, no ngotyo Hamba, onthue kamatufende otyilolo.’

Nambukondonosole anumana unene. Atolela ovanthu vae okuti: ‘Yakesei ofolono ovikando epandu-vali aitokota vali tyipona itokautale!’ Atumu omafualali okuti: ‘Kutei ovalume ava, amuveyumbu  mofolono yotupia!’ Ofolono ankho yatokota unene iya etyi omafualali ehika ponthele yayo, avankhi liwa-liwa. Ova Hebreu ovo vetatu atokela motupia. Mahi etyi Nambukondonosole avendamena mofolono amono ovalume vekuana vekahi nokuenda-enda. Nokuahuva apulu omafualali okuti: ‘Katuayumbile-mo vala ovalume vetatu? Ame ndyiete vekuana, mahi umwe welifua noandyu!’

Nambukondonosole afuene pofolono aihana okuti: ‘Endyuei tundei-mo vaumbili va Huku Omukulami!’ Ovanthu avahuvu etyi vamona Sadrake na Mesake na Abedeneku valupuka mofolono yotupia tyihapile. Olutu luavo no nohuki mbavo novikutu viavo kaviapile tupu ankho kavanikile omuihi.

Nambukondonosole ati: ‘Huku ya Sadrake na Mesake na Abedeneku, omunene. Watuma oandyu yae iveyovole. Kutupu vali huku omukuavo welifua nae.’

Ngo va Hebreu ovo vetatu, okuti noove watokola okukala omukuatyili ku Jeova, namphila uvasiwa novitateka?