Jatun monumentuta suëñunqampita wallka tiempullatam rey Nabucodonosorqa örupita jatun imäginta ruratsirqan. Nïkurmi Düra nishqan pampaman churatsirqan, y entëru nacionpita llapan precisaq nunakunatam tsëman qayatsirqan, jina Sadrac, Mesac y Abednëgupis ëwayarqanmi. Y kënömi mandakurqan: “Trompëtakuna, arpakuna y gaitakuna waqayanqan höram imäginpa nöpanman qonqurikuyänëki. Tsëta mana ruraq kaqqa rawrëkaq hornumanmi jitashqa kanqa”. ¿Ima ninkitaq? ¿Tsë kiman hebreukunaqa qonqurikuyarqantsuraq? ¿O Jehovällata adorayanqantatsuraq rikätsikuyarqan?

Müsicata tocayänampaq rey mandakuriptinmi, llapankuna qonqurikïkur imäginta adorayarqan. Peru Sadrac, Mesac y Abednëguqa manam adorayarqantsu. Tsëta cuentata qokurirmi reyta kënö niyarqan: “Kimaq hebreukunam monumentïkita adorëkäyantsu”. Tsënam reyqa kimanta qayëkatsir kënö nirqan: “Sitsun monumentüta kanan kaq kutichö adorayankitsu, tsëqa rawrëkaq hornumanmi jitashqa kayanki. Y manam ni mëqan diospis salvayäshunkitsu”. Pëkunanam kënö niyarqan: “Manam adorayäshaqtsu. Diosnïkunaqa puëdinmi salvayämëta. Y mana salvayämänan kaptimpis, monumentïkitaqa manam adorayäshaqtsu”.

Nabucodonosorqa alläpam piñakurqan, y sirweqninkunatam kënö nirqan: “¡Qanchis kuti mas hornuta achachätsiyë!”. Nïkurmi soldädunkunata kënö nirqan: “Kë nunakunata pankëkur hornuman jitarkuyë”. Y alläpa achachaptinmi soldädukunaqa  punkuman chärirlla wanuriyarqan. Kiman hebreukunaqa hornu rurinmanmi ishkiyarqan. Peru Nabucodonosor rikëkunampaqqa chuskoqnam purir këkäyarqan. Y alläpa mantsakarmi yanapaqninkunata kënö tapurqan: “¿Hornumanqa manaku kimaqllata jitayarqan? Kananqa chuskoqnataq këkäyan, ¡y juknäqa angel niraqtaq!”.

Nabucodonosorqa hornuman maslla witirirmi sinchipa kënö nirqan: “¡Yarqayämï Llapampa Janampa Këkaq Diospa sirweqninkuna!”. Y Sadracta, Mesacta y Abednëguta sänuta rikëkurmi llapankuna espantakuyarqan. Ninaqa manam ni qarankunata ni aqtsankunata imanashqatsu kanaq, ni röpankunapis manam qoyëllanatsu (qoshnillanatsu) asyanaq.

Nabucodonosorqa kënömi nirqan: “¡Sadracpa, Mesacpa y Abednëgupa Diosninqa alläpa puëdeqmi! Angelninta kachëkamurmi pëkunata salvashqa. Pëkunapa Diosninnöqa manam ima diospis kantsu”.

Tsë kiman hebreukunaqa manam ni imanöpapis Jehoväta jaqiriyarqantsu. ¿Qamqa pëkunanötsuraq kanki?