Rey Nabucodonosor muscushca jipaca paiman rijchajtami ‘orohuan rurachishpa shayachirca’. “Chaitaca, Babilonia llactapi tiaj Dura shuti pambapimi shayachirca”. Chaipimi chai llactamanda ashtahuan importante gentecunata, Sadrac, Mesac, Abednego jovengunatapash tandachirca. Jipamanga reyca cashnami mandarca: ‘Tucui canguna, bocinata, gaitata, arpata tocajta uyashpaca, Nabucodonosor orohuan rurachishca ñaupajpi cungurishpa ninanda alicachinguichi. Maijambash na cungurishpaca nina rupajuj jornopimi ñapash shitai tucunga’ nishpa. ¿Imatata yuyangui? ¿Chai quimsa hebreocunaca orohuan rurashca imagenba ñaupajpi cungurircacha? O ¿Jehová Diostallacha adoragrinajurca?

Chai jipami reyca musicata tocachun mandarca. Chaita uyashpami ‘tucui gentecuna cungurishpa alicachinajurca’. Shinapash Sadrac, Mesac, Abednego jovengunaca na cungurircachu. Chaita shuj jaricuna ricushpami Nabucodonosorman cashna villarca: ‘Can churashca Sadrac, Mesac, Abednegoca orohuan rurachishpa can shayachishcataca na alicachinajunllu’ nishpa. Chaimi reyca chai quimsa jovengunata cayashpa cashna nirca: Cutinmi ‘ñuca rurachishca ñaupajpi cungurishpa alicachichun’ shuyasha. ‘Canguna na alicachijpica, chai ratomi nina rupajuj jornopi shitachun mandasha. Maijan diospash ñuca maquimandaca na cacharichingachu’ nishpa. Shina nijpimi chai jovengunaca nirca: Ñucanchicuna chai imagenda alicachichunga na shuyanachu capangui. ‘Ricui, ñucanchi Taita Diosca canba maquimandapash cacharichingapachami’. ‘Pai na quishpichijpipash jatun mandajlla, ñucanchica can rurachishpa shayachishcatapash napacha alicachishunllu’ nishpa.

Shina nijpimi Nabucodonosorca ninanda culirashpa paita sirvijcunataca ‘jornota rupajyachin cashcamandaca, canchis viaje yalicaman rupajyachichun mandarca’. ‘Jipaca paipa soldadocunatami Sadrac, Mesac, Abednegotapash huatashpa, nina  rupajuj jornoman shitachun mandarca’. Chai jorno rupa rupa cajpimi ‘Sadrac, Mesac, Abednegota shitajcunatapash, chai ninaca huañuchirca’. Shinami chai quimsa jovengunaca nina rupajuj jornoman shitai tucurca. Chai jipaca Nabucodonosorca jornoman quimirishpami nina ucupi chuscupuracuna purinajujta ricurca. Chaimi ‘Nabucodonosorca ninanda manllarishpa’. ‘Paita sirvijcunataca cashna tapurca, nina rupajuj jornopica ¿nachu quimsapuracunatalla huatashpa shitarcanchi?’ ‘Ricuichi, ñucaca chuscu runacunatami nina chaupipi ricuni. Chai chuscumanda shujcarin shuj ángel cuendami’ can nishpa.

Shina ricushpami Nabucodonosorca ‘rupajuj jornoman quimirishpa cashna caparirca: ‘Jahua pachapi causajuj Taita Diosta sirvijcuna chai ucumanda Ilujshimuichi’’ nishpa. Sadrac, Mesac, Abednegopash jornomanda llujshijpi imapash na pasashcata ricushpaca manllarishpami ricunajurca. Paicunapa aicha carapash, ajchapash, paicuna churajushcapash na rupashcachu carca. Cushnillapash na ashnanajurcachu.

Nabucodonosorca nircami: ‘Sadrac, Mesac, Abednegopa Taita Diosca alipachamari can. Paita sirvijcunata quishpichingapami paipa angelta cachamushca’. Pai shinaca ‘maijan shuj diospash na tianllu’ nishpa.

Quimsa hebreocunaca ima pasajpipash Jehová Diostalla tucuipi cazunatami decidishca carca. ¿Canbash paicuna shina cangapaj munanguimanllu?