Disavo vreme palo so o Navuhodonosor dikhlja jekh suno ando kip, ov čerdža jekh baro kip ando zlato. O kip čhivdža ki jekh ravnica koja vičindža pe Dur hem vičindža sa e važna manušen ando po kraljevstvo te aven odothe. Maškar oljende hine o Sedrah, o Misah hem o Avdenago. O kraljo naredindža: „Ked ka šunen i muzika ando trube, harfe hem gajde pokloninen tumen anglo kip! Svako ko na poklonini pe, ka ovel fordimo ki jag.“ Da li akala trin Jevreja ka pokloninen pe anglo akava kip ja ka ačhoven verna e Jehovase?

Tegani o kralj naredindža i muzika te počmini. Sare poklonindže pe, samo o Sedrah, o Misah hem o Avdenago na čerdže odova. Neko ando manuša primetindža odova hem phendže e kraljose: „Okola trin Jevreja na poklonindže pe anglo kip.“ O Navuhodonosor naredindža te anen ljen anglo ljeste hem phendža ljendže: „Ka dav tumen pana jekh šansa te pokloninen tumen anglo kip. Ako paljem na pokloninena tumen, tegani ka fordav tumen ki peć. Nane devel kova ka spasini tumen mandar.“ On phendže ljese: „Na valjani amendže dujto šansa. Amaro Devel ka spasini amen. Ama, čak hem te na čerel odova, amen paljem na ka poklonina amen anglo kip.“

O Navuhodonosor hine but holjamo. Phendža pe slugendže: „Čeren i jag ki peć te ovel efta puti potati  nego obično!“ Tegani naredindža pe vojnikonendže: „Phanen akalje manušen hem forden ljen ki peć!“ I peć hine odobor tati so o vojnikija kola ljegardže ljen mulje ko isto trenutko ked alje uzi peć. O trin Jevreja hine fordime ki jag. Ama, ked o Navuhodonosor dikhlja andre ki peć, ov dikhlja štare dženen sar phirena, a na trinen. Tegani, but darandilo hem pučlja peklje službenikonen: „Na li fordindžam trine dženen ki jag? Me dikhava štar džene, a jekh oljendar dičhola sar anđeo!“

O Navuhodonosor dželo popaše uzi peć hem vičindža: „Ikljoven avri, tumen so služinena e Najbare Devljese!“ Sare hine iznenadime ked dikhlje e Sedrahe, e Misahe hem e Avdenago sar ikljona andi peć dživde hem saste. Oljengi koža, o bala hem o šeja na hine tharde hem čak ni na mirišindže ko čuro.

O Navuhodonosor phendža: „O Devel ando Sedrah, Misah hem Avdenago tano Baro. Ov bičhaldža pe anđele hem spasindža ljen. Nijekh devel nane sar oljengo.“

Da li hijan odlučno sar akala trin Jevreja te ačhove verno e Jehovase bilo so te ovel?