Bọu tempong i Datu Nebukhadnezar nakaěbạ ipi soal u patong, i sie někoạ patong gěguwạ bọu bul᷊aeng. I sie nẹ̌taho patong ene su Dataran Dura. Bọu ene, i sie něngoro kěbị taumata penting pẹ̌komol᷊ẹ̌ sene. I Syadrakh, Mesyakh, dingangi Abednego lai ene sene. Datu něgělị parenta, ’Su apang i kamene makaringihẹ̌ tingihu terompet, harpa, dingangu alatẹ̌ musikẹ̌ wal᷊inẹ, i kamene harusẹ̌ pẹ̌suba su patong ene! I sai tawe mẹ̌suba sarung iwahung sarang putung.’ Apa tělung katau mangangudạ Ibrani ini sarung mẹ̌suba maněmbah patong ene arau kětạeng maněmbah si Yehuwa?

Bọu ene, Datu nẹ̌parenta tadeạu musikẹ̌ ipararingihẹ̌. Kěbị taumata nẹ̌suba něněmbah patong ene, katewe i Syadrakh, Mesyakh, dingangi Abednego tala. Taumata apang nakasilo ene něhabarẹ̌ su Datu, ’Tělung katau mangangudạ Ibrani ene madiri maněmbah patong nikoạ i Tuang.’ Datu nẹ̌kui si sire kụ naul᷊ị, ’Iạ měgělị kesempatan si kamene. Mạeng i kamene tawe mẹ̌suba, i kamene sarung děmẹkang sarang tampạu pěnanutungang. Tawẹ apa Mawu makasal᷊amatẹ̌ si kamene.’ I sire simimbahẹ̌, ’Kuhạe Tuang. Mawung kami sarung měnal᷊amatẹ̌ si kami. Katewe mạeng i Sie tawe něnal᷊amatẹ̌ si kami, i kami tatapẹ̌ tawe maněmbah patong ene.’

Datu sěbạe nẹ̌pědu si sire. I sie nẹ̌bera su manga ělange, ’Koạ pakatětị tampạu pěnanutungang ene pitung sul᷊ẹ limembong matětị sul᷊ungu wiasane!’ Bọu ene i sie něngoro su manga prajurite, ’Ikị i sire, kụ  děmẹ sarang putung!’ Tampạu pěnanutungang ene sěbạe matětị-tětị sarang manga prajurit ene natutung. Tělung katau mangangudạ Ibrani ene nirěmẹ sarang putung. Bọu ene, Datu nakasilo piạ ěpạ u katau dụdal᷊eng su ral᷊ungu putung ene. I sie sěbạe natakụ kụ nẹ̌kiwal᷊o su manga pejabat, ’Bal᷊inẹbe kětạeng tělung katau nirěmẹ i kitẹ sarang putung? Iạ nakasilo piạ ěpạ u katau, kụ sěngkatau kere malaekatẹ̌!’

Datu Nebukhadnezar nẹ̌těngkarani sarang tampạu pěnanutungang kụ nẹ̌kui, ’Manga ělangu Mawu Karangetange, sěbangke!’ I sire siměbang. I sire tawe nal᷊esẹ sarang kadodọ. Pisi, utạ, dingangu lakụ i sire tawe natutung, kụ sarang darurung tipu lai tawẹ apa si sire. Kěbị taumata naherang.

Datu naul᷊ị, ’Mawung i Syadrakh, Mesyakh, dingangi Abednego sěbạe mawantugẹ̌. I Sie něndolohẹ̌ malaekat’E gunang měnal᷊amatẹ̌ si sire. Tawẹ apa mawu kere Mawung i sire.’

Kere tělung katau mangangudạ Ibrani, apa i kau lai mapulu turusẹ̌ masatia si Yehuwa tawẹ soale apa mariadi?