Yange mnyam cier Nebukadinesar sha kwagh u eev shighe karen yô, Nebukadinesar er eev mbu kehen sha zenaria. A ver eev mbu shon shin pev u Dura. Maa a yila mbahemenev mba ken tartor na cii, kua Saderaki man Meshaki man Abedi-nego, ve va kohol hen ape a ver eev mbu shon la. Tor maa na zwa ér: ‘A va hiin u tôngon korough man imar man molo yô, ior cii ve gure inya, ve civir eev mbu mo tor Nebukadinesar m er la! Hanma or u nana gure inya nana civir mbu ga yô, a gbihi nan ken atô u atse a usu u lu yeghen ker la.’ Mbaheberu mba utar mbara kpa vea gure inya vea civir eev mbu shon, shin vea civir Yehova tseeghle?

Tor na zwa mba hiin u kuhwan ityogholough yô, ior cii gure inya gba civir eev. Kpa Saderaki man Meshaki kua Abedi-nego yô, ve gure inya ga. Ior mbagenev nenge kwagh ne maa ôr tor ér: ‘Mbaheberu mba utar mbara venda u civir eev ou mbura.’ Tor maa tindi i za va a ve, a kaa a ve ér: ‘M ngu kaan a ven hegen mer gure civir nen eev mbu m er ne. Aluer kwa ne kpa ne venda yô, me kende ne ken atô u atse a usu u yeghen ker la. Ma aôndo môm kpa una fatyô u yiman ne sha ikyev yam ga.’ Ve kaa a na ér: ‘Kwa ne kpa a gba sha mi ga. Aôndo wase una yima se. Aluer a yima se ga je kpa, se civir eev mbura ga, Tor.’

Tor Nebukadinesar yange nyoon ishima tsung. Nahan a kaa a ior nav ér: ‘i kende usu ken atse a usu u yeghen ker la, u̱ tsee i hemba usu u u lu vanden yeghen la kwa taankaruhar!’ Tor shi na ushoja nav zwa kaa ér: ‘Kange nen ior mban, kende nen ve ken usu!’  Usu la yange u tsee gande, nahan ushoja mbara mba zan ikyua yô, u hia ve, maa ve kpe her ave ave je. Mbaheberu mba utar mbara gema gba ken usu la. Kpa Nebukadinesar ngur kenger ken atse a usu shon yô, a nenge iorov unyiin lu zenden ker, kera lu iorov utar tseegh ga. Nahan cier un iyol, a pine mbatomov nav ér: ‘Ka iorov utar tseegh ashen se kende ve ken usu ne gaa? M ngu nengen a iorov unyiin, man ugen la ngu er ka ortyom nahan!’

Nebukadinesar mough za ikyua a atse shon za ôr genger genger ér: ‘Due nen, ne ior mba civir Aôndo u Hemban Sha!’ Yange cier hanma or cii iyol er Saderaki man Meshaki man Abedi-nego due ken usu shon, man kwagh cuku tsô kpa er ve ga yô. Kwavyolough ve man ice ve i sha ityou kua akondo a ve cii hia ga, shi mnyim tsô kpa huma ve iyol ga.

Nebukadinesar maa kaa ér: ‘Aôndo u Saderaki man Meshaki man Abedi-nego hemba sha won cii. A tindi ortyom na va yima ve. Ma aôndo ugen ngu er Aôndo ve nahan ga.’

U kange ishima wer, a lu nyi je ia er u kpa u za hemen u civir Yehova sha mimi, er Mbaheberu mba utar mbara nahan kpa?