Fumu Nebukadanezara yati yalota chikozgu, nyengu yinyaki yingupanga chikozgu cha golidi. Iyu yinguŵika chikozgu chenichi muchidika cha Dura ndipu yingudana ŵanthu akuzirwa a mucharu cho kusazgapu Shadreke, Mesheke ndi Abedenego kuti akawungani panthazi pa chikozgu chenichi. Fumu yingulamula kuti: ‘Asani mwavwa ŵaka kuliya kwa mbata, zeze ndi fyoliro mutenere kugwadiya chikozgu. Weyosi yo walekengi kugwada waponyekengi mung’anju ya motu.’ Kumbi Aheberi atatu ŵenaŵa agwadiyengi chikozgu pamwenga asopengi Yehova pe?

Fumu yingulamula kuti ambi sumu. Weyosi wangugwada ndi kusopa chikozgu kupatuwaku Shadreke, Mesheke ndi Abedenego. Anthurumi anyaki anguŵawona ndipu anguchikambiya fumu kuti: ‘Anyamata Achiheberi atatu akana kusopa chikozgu chinu.’ Nebukadanezara wanguŵadana ndipu wanguŵakambiya kuti: ‘Ndikupaseningi so mwaŵi unyaki wakusopa chikozgu. Asani mwakana ndikuponyeningi mung’anju ya motu. Palivi chiuta yo wangakutaskani kwaku ini.’ Yiwu angumuka kuti: ‘Tikhumba so mwaŵi unyaki so cha. Chiuta widu wangatitaska. Kweni chinanga kuti wangaleka kutitaska, tisopengi mbwenu cha chikozgu chinu, fumu.’

Nebukadanezara wangukwiya ukongwa. Iyu wangukambiya ateŵeti ŵaki kuti: ‘Sonkhezani ng’anju maulendu 7 kuluska mo mwasonkhiyanga nyengu zosi.’ Pavuli paki wangulamula asilikali ŵaki kuti: ‘Mangani anyamata yaŵa ndipu aponyenimu.’ Ng’anju yo yingukole ukongwa ndipu asilikali wo angundere kufupi angufwa nyengu yeniyo. Aheberi atatu ŵenaŵa, anguŵaponya  mumotu. Nebukadanezara wati wawona mung’anju, wanguwona kuti mwenga ŵanthu 4 wo ayendanga m’malu mwa ŵanthu atatu. Iyu wanguchita mantha ndipu wangufumba alongozgi ŵaki kuti: ‘Asi tinguponyamu ŵanthu atatu? Ndiwona ŵanthu anayi ndipu yumoza wawoneka nge mungelu!’

Nebukadanezara wanguluta pafupi ndi ng’anju ndipu wangudana kuti: ‘Tuwanimu, imwi ateŵeti aku Chiuta Wapachanya Ukongwa!’ Weyosi wanguzizwa kuwona Shadreke, Mesheke ndi Abedenego atuwa mung’anju kwambula kufya. Liŵavu, sisi kweniso vakuvwala vawu vingufya cha ndipu anunkhanga fungu la motu cha.

Nebukadanezara wanguti: ‘Chiuta waku Shadreke, Mesheke ndi Abedenego ngwanthazi ukongwa. Iyu wangutuma mungelu kuti waŵataski. Palivi chiuta munyaki wakuyanana ndi wawu.’

Nge Aheberi atatu, kumbi ukhumbisisengi kuja wakugomezeka kwaku Yehova mwambula kutoliyaku kanthu vo vingakuchitikiya?