Tátsekua enga rei Nabukodonosori tsánharhipka estatuani, úrkuarhispti estatua ma orueri. Dura anapu pákua jimbo péraspti ka tánaspti iámindu kʼuiripuni enga kʼéri ambepka jima, ístu Sadrakini, Mesaki ka Abedneguni. Rei, juramuspti: “Engajtsï kurhauaka sïuanguechani, trompetechani ka arpechani, jatsiskajtsï para tinguixurhikuni estatuani. Né enga no ísï uáka, jornarhu kʼuanijpanhaati”. ¿Nari exesïni? ¿Tinguixurhikupirinksï tanimu ebreuecha estatuani? ¿Oksï Jeobantku kómarhipirini?

Jimajkani rei juramuspti eskaksï kústapiringa. Iáminduksï tinguixurhispti ka kómarhini estatuani. Peru Sadraki, Mesaki ka Abednegu nóksï kómarhispti. Máru achatichaksï kuenta íntskukuarhispti ka arhisptiksï reini: “Imaksï tanimu ebreuecha no kómarhixati chíti estatuani”. Nabukodonosori pʼitajkuarhiaspti ka arhiaspti: “Íntskuakaksïni máteru oportunidadi parajtsï kómarhini estatuani. Ka engajtsï no ísï úska, jorna chpiririrhuksïni kʼuanijpaaka. Nóksïni ma diosï uáti salbarini”. Imaksï arhispti: “Nochi uétarhinchasïnga máteru oportunidadi. Juchari Tata Diosïjtsïni uáti salbarini. Ka nájkirukajtsïni no salbariska, oh rei, nochi kómarhiaka estatuani”.

Nabukodonosori kánikua ikiaspti. Arhiaspti imeri jántspirichani: “¡Sieti uelta sánderu jorhepera je jornani!”. Tátsekua, arhiaspti soldaduechani: “Jótaa je i tumbiichani ka kʼuanijpaa je”. Jorna kánikua jorhepiti jarhaspti, jimboksïsï soldaduecha uarhipti engaksï andarherapka.  Tanimu ebreuechaksï chpirirhu kʼuanijpanhaspti. Tátsekua, Nabukodonosori eranhaspti jornarhu ka exespti eskaksï tʼámu kʼuiripuecha xanharaxapka ka no tanimu. Kánikua chéspti ka arhiaspti imeri jarhuajpirichani: “¿Nochi tanimu kʼuiripusï kʼuanijpaa? Ji tʼámu exeaxaka, ¡ka máechakua ísï xarharasïndi enajki ánjili máe!”.

Nabukodonosori andamukueraspti sánderu jornarhu ka uinhachaspti: “¡Uénta je, cha engajtsï ima Tata Diosïri marhuarika enga Sánderu Kʼéri ambeka!”. Iáminduksï ísku pakaraspti engaksï exepka eskaksï Sadraki, Mesaki ka Abednegu, uéjpintaxapka chpirirhu ka eskaksï no ma ambe úkuarhinchaspka. Ni sikiera imecheri pieli, jauiri o xukuparhakua kurhipi ka niksï sïraata jájkundeeni.

Nabukodonosori uandaspti: “¡Tata Diosï Sadrakiri, Mesakiri ka Abednegueri kánikua kʼéri ambesti! Axasti imeri ánjilini para salbariuani. No ma diosï jarhasti enga májkuenika eska indecheri”.

Tanimu ebreuechaksï eratsitixapti méntkisï kurhajchani Jeobani, ambe uéjki úkuarhini. ¿Uékasïniri méntkisï marhuakuni Jeobani ísï eskaksï ima?