Tau taime i muri aˈe i te moemoeâ a te arii Nebukanesa no nia i te tii, ua hamani oia i te hoê idolo auro rahi roa. Ua faatia oia i te reira i te vahi papu o Dura. Ua haaputuputu te arii i te mau taata o te fenua e tiaraa teitei roa ˈˈe to ratou, mai ia Sadaraka, Meseka e Abede-nego. Ua ani te arii ia ratou ia tia i mua i te idolo. Ua faaue te arii ia ratou pauroa: ‘A faaroo ai outou i te taˈi o te pu, te kinura e te sumephonia, a tipapa i mua i te tii! Te taata o te ore e tipapa i mua i te tii, e hurihia ïa oia i roto i te umu auahi ura ra.’ E tipapa anei na taurearea Hebera e toru i mua i te tii aore ra e haamori anei ratou ia Iehova anaˈe?

I muri iho, ua faaue te arii ia faataˈihia te upaupa. Ua tipapa te mau taata atoa i mua i te tii e ua haamori ratou i te reira, eiaha râ o Sadaraka, Meseka e o Abede-nego. Ua ite te tahi mau taata i te reira e ua faaite atu ratou i te arii: ‘Ua patoi teie na taurearea Hebera e toru i te haamori i te tii ta oe i faatia.’ Ua ani Nebukanesa ia afaihia mai ratou e ua na ô oia: ‘E tapiti faahou tatou ia nehenehe outou e haamori i te tii. Ia ore outou e na reira, e huri au ia outou i roto i te umu auahi. Eita hoê aˈe atua o te nehenehe e faaora ia outou i to ˈu nei rima.’ Ua pahono ratou: ‘Eita e faufaa ia tapiti faahou. E faaora iho â to matou Atua ia matou. Noa ˈtu eita Oia e na reira, e te arii e, eita roa ˈtu matou e haamori i te tii.’

Ua riri roa Nebukanesa. Ua parau oia i ta ˈna mau tavini: ‘Ia tutui outou i te umu auahi tataihitu hau atu â i tei matauhia!’ I muri iho, ua faaue te arii i ta ˈna mau faehau: ‘A taamu i teie mau taata e a huri ia ratou i roto i te umu auahi!’ Ua veavea mau te umu auahi. A piri atu â ˈi te mau faehau i te reira, ua pohe taue ratou. Ua  hurihia te mau taurearea Hebera e toru i roto i te auahi. Tera râ, a hiˈo ai Nebukanesa i roto i te umu auahi, ua ite oia i te mau taata o te hahaere noa i roto. E maha taata râ tei itehia, e ere e toru noa. Ua riaria roa oia e ua ani oia i ta ˈna mau taata toroa: ‘Aita anei tatou i huri e toru taata i roto i te auahi? E maha hoi taata ta ˈu e ite ra. Hoê râ o ratou, mai te melahi ra to ˈna huru!’

Ua haere atura Nebukanesa i pihai iho i te umu auahi e ua tuô oia: ‘A haere mai i rapae, e te mau tavini a te Atua Teitei roa ˈˈe!’ Ua maere mau te mau taata atoa i te iteraa ia Sadaraka, Meseka e ia Abede-nego e haere mai i rapae i te auahi. Aita roa to ratou tino i pepe. Aita atoa to ratou iri, rouru e ahu i ama i te auahi e aita roa ˈtu te hauˈa auahi i mau i nia ia ratou.

Ua na ô o Nebukanesa: ‘Mea teitei roa te Atua o Sadaraka, Meseka e o Abede-nego. Ua tono Oia i ta ˈna melahi e ua faaora Oia ia ratou. Aita hoê aˈe atua mai to ratou Atua.’

Mai teie na taurearea Hebera e toru, ua faaoti papu anei oe e vai taiva ore noa ia Iehova noa ˈtu te tupuraa?