FIANARAN̈A 61
Tsy Nety Nankohoko Iro
Elaela tafara tatỳ, nan̈amboatra sarivongana volamena naventy be Panjaka Nebokadnezara. Nataony tamy tany lemaka ta Dora raha io. Nikahiny nan̈aton̈o tio olo ambony jiaby, an̈isanizen̈y Sadraka, Mesaka, ndreky Abednego. Panjaka nivolan̈a: ‘Anaro jiaby tsy maintsy mankohoko man̈oloan̈a sarivongana io koa fa maharen̈y feony trompetra ndreky harpa, baka io sodin̈y. Lan̈iany tsy mety mankohoko, hatsipy an̈aty lafaoro may mare.’ Hankohoko iro Hebreo telo lahy io, sa iro hivavaka amy Jehovah fo?
Nirahiny panjaka nalefa lamoziky. Olo jiaby nankohoko aby, koa tsy Sadraka, Mesaka, ndreky Abednego fo. Nisy olo nahita iro, ke nan̈ampanga tamy panjaka: ‘Iro Hebreo telo lahy io tsy nety nivavaka tamy sarivongana nataonao.’ Nebokadnezara nikaiky iro, sady nivolan̈a: ‘Hirahiko ampody ndraiky lamoziky, ke anaro mbala mety mivavaka amy sarivongana io. Anaro koa mbala tsy mety fo, anaro hatsipiko an̈aty lafaoro. Iô hahitako Zan̈aharinaro hamonjy anaro zen̈y.’ Iro nivolan̈a: ‘A panjaka, aza ampody eky lamoziky. Zan̈aharinay mahavonjy zahay. Ndray izy tsy hamonjy zahay, zahay tsy hivavaka amy sarivongana io.’
Neloko mare Nebokadnezara! Hoizy taminolonany: ‘Hafanà mare, impitony mahazatra lafaoro!’ Izy koa nivolan̈a tamy maramilanany: ‘Fiheza iro telo lahy io, baka io atsipia ao!’ Nay mare lafaoro io, ke naty iro maramila nanipy iro tao. Nebokadnezara amy zay koa fa nizaha tan̈aty lafaoro tao, izy nahita lelahy efatra nandehandeha, ke navozo mare izy. Hoizy taminolo ambony aby io: ‘Tsy telo lahy ma natsipintsika tan̈aty tao? Karaha olo efatra ndraiky hitako, baka io mira anjely araiky amindro.’
Nebokadnezara nan̈aton̈o narikitry vavany lafaoro io, baka io nikaiky: ‘Miboaha anaro, fa anaro io panompony Zan̈ahary Farany An̈abo!’ Lany fan̈ahy olo jiaby nahita Sadraka, Mesaka, ndreky Abednego. Tsy nay foeky hoditrindro, fan̈evandro, lamba nisikindro. Tsisy fofoko setroko foeky iro.
Ho Nebokadnezara: ‘Mahery ankitin̈y Zan̈ahariny Sadraka, Mesaka, ndreky Abednego. Nirahiny anjelinany hamonjy iro. Tsisy zan̈ahary mira Zan̈aharindro io.’
Tapakevitry tsy hivadiky amy Jehovah mira Hebreo telo lahy io koa ma anao, na ino na ino raha mandalo?
“Jehovah Zan̈aharinao zaraiky fo tsy maintsy andohalifanao, ndreky an̈anovanao fanompoan̈a masin̈y.”—Matio 4:10
