Despué de guníʼ xcaandaʼ Nabucodonosor estatua que, biseendaʼ gúnibe ti bidóʼ naroʼbaʼ de oro. Bizuhuaacabe ni lu ti layú stiʼ Dura ne biʼniʼ reunirbe guiráʼ ca binni risaca stiʼ guidxi que, dede né Sadrac, Mesac ne Abednego. Óraque biʼniʼ mandar rey que: «Ora xhidxi ca trompeta, ca arpa ne ca gaita, naquiiñeʼ guzuxíbitu nezalú bidóʼ riʼ. Tu qué guni ni la? zuneʼ castigar laa ne zaguaa laa ndaaniʼ horno ndaʼ ca». ¿Lii xi rábiluʼ? ¿Zuzuxibi guionnaʼ hebreu riʼ nezalú bidóʼ ca la? ¿O zuni adorárcabe Jiobá si?

Óraque, biʼniʼ mandar rey riʼ xhidxi saa que. Guiráʼ binni bizuxibi ne biʼniʼ adorarcaʼ bidóʼ que. Peru Sadrac, Mesac ne Abednego qué ñúnicaʼ ni. Caadxi hombre bidiicaʼ cuenta ne gúdxicaʼ rey que: «Guionnaʼ hebreu riʼ cadi cayuni adorarcaʼ bidóʼ ni bíʼniluʼ». Biseendacaa Nabucodonosor guionnaʼ joven riʼ ne gúdxibe laacaʼ: «Chigudieeʼ laatu sti oportunidad para guni adorartu bidóʼ riʼ. Pa qué gúnitu ni, zaguaa laatu ndaaniʼ horno ndaʼ ca. Ne nin ti dios qué zanda gulá laatu de lu nayaʼ». Ca joven que bicábicaʼ laabe: «Cadi caquiiñedu sti oportunidad. Zanda gulá Dios stidu laadu, ne pa qué gúnibe ni, laaca si qué zuzuxíbidu nezalú bidóʼ ca».

Guizáʼ bidxiichi Nabucodonosor. Gúdxibe ca hombre runi xhiiñabe que: «¡Lagusindáʼ horno ca gadxe biaje jma de biaʼ maʼ nandáʼ ni!». De raqué biʼniʼ mandarbe ca soldadu que: «Lagundiibi ca hombre riʼ ne lagundaa laacaʼ ndaaniʼ horno ca». Tantu nandáʼ horno que dede guti ca soldadu  que ora bidxíñacaʼ ruaa ni. Biaba guionnaʼ hebreu que lu bele. Óraque, bidxiña Nabucodonosor gaxha de horno que ne biiyaʼ canazá tapa binni ndaaniʼ ni ne cadi chonna. Guizáʼ bidxíbibe ne gunabadiidxabe ca hombre racané laabe: «¿Cadi chonna hombre nga guluʼnu ndaaniʼ horno ca la? Peru naa tapa cayuuyaʼ, ¡ne tobi de laacabe ruluíʼ ti ángel laa!».

Bidxiña Nabucodonosor jma gaxha de horno que ne bicaa ridxi: «¡Xpinni Dios ni jma Nandxóʼ, laguiree!». Guiráʼ cani nuu raqué guizáʼ bidxagayaacaʼ ora bíʼyacaʼ biree Sadrac, Mesac ne Abednego de ndaaniʼ horno que ne qué ñácacaʼ gastiʼ. Qué nidxuíʼ ládicabe ne qué ñaʼquiʼ guicha íquecabe nin xhábacabe ne nin cadi lica nindáʼ guʼxhuʼ xhábacabe.

Nabucodonosor guníʼ: «¡Guizáʼ nandxóʼ Dios stiʼ Sadrac, Mesac ne Abednego! Biseendabe ti ángel para gulá laacabe. Gástiruʼ sti dios casi Dios stícabe».

Gudixhe ique guionnaʼ hebreu riʼ guzuubacaʼ stiidxaʼ Jiobá, neca guizaacacaʼ intiica cosa. ¿Ñee racaláʼdxiluʼ gácaluʼ casi laacabe la?