Diti xidzú de goló goniʼ xcaʼal Nabucodonosor, bixelbu buñ nasaʼ toib imagen nasoʼdii de ór. Bisagaʼbu láani toib lagary ni góc laa Dura né bitopbu guirá buñnan de gudx Babilonia, dada Sadrac, Mesac né Abednego goyee. Reycu buny mandary: «Órni guicadiagto guicudxyibu trompet, arpas né gaitas, ór cú non guixixipto nisló imagen reʼ. Nitisi buñ ni diti gony láani, sagoʼya láabu lainy horno laguii». Xpensarylo, ¿bixixip tzón mbioxhlascu nislóni la? ¿O nosi bienyibu Jehová la?

Ór cú rey bixelbu buñ goʼol canción. Guiránac buñ bixixip nisló imagencu. Per Sadrac, Mesac né Abednego diti bixixipyibu. Tipnés buñ bibiʼ que diti bixixipyibu né goygúchcayibu Nabucodonosor: «Tzón mbioxhlasca diti caxixipyibu nisló imagen ni bunylo». Nabucodonosor bixelcaʼ layibu né goniʼbu: «Guidudi stoib oportunida lóoto par guixixipto nisló imagen reʼ, né pal diti ronyto láani sagoʼya lóoto lainy horno laguii. Né diti sioʼ ni toib dioxh ni labúu guilaa lóoto ladxñaya». Layibu cuapyibu: «Diti caquiindo stoib oportunida. Dios xtunydo labúu salaabu lóodo, ná pal diti sonybu láani, lóodo diti saxixipdo nisló imagen xtunylo».

Nabucodonosor bidzuitzgoluʼ né gochbu tipnés xpiimbu: «¡Colcoʼ guii hornoca gatz buelt más que ni ronyto láani guirá ór!». Gochbu soldad xtunybu: «Colguilip mbioxhlasca né colguisal layibu lainy horno». Nigolú godudylaʼ hornocu por ngú guirá  soldadcu goityibu órni bisalbu tzón mbioxhlascu lainyni. Tzón mbioxhlascu biabyibu ló guii. Órni Nabuconodosor bibiʼbu lainy hornocu, ma diti bibiʼbu tzón buñ, xalagary ngú bibiʼbu tap buñ casaa ló guii. Nabucodonosor nigolú bidzuiby né gonabdiitzbu xpiimbu: «¿Xí diti nosi tzón buñ bisalno ló guii la? Nigoreʼ cabiʼya tap buñ, ¡né toibbu nac xomod toib ángel!».

Nabucodonosor bibigbu más roʼ hornocu né goniʼbu: «¡Colguireʼ, lóoto ni ronyto ni ná Dios ni noʼ más Guiaʼ!». Guiráyibu bidziguiaʼyibu órni bibiʼyibu Sadrac, Mesac né Abednego bireʼ ló guii né diti noʼ xi gocyibu. Diti goyaʼij laidyibu, diti goyaʼij guitzguicyibu, diti goyaʼij xhapyibu, né diti ralaʼ goʼoxyibu órni bireʼyibu cú.

Nabucodonosor goniʼ: «¡Dios xtuny Sadrac, Mesac né Abednego ronybu galrradziguiaʼ! Bixelbu ángel xtunybu par bilaa layibu. Diti noʼ stoib dios xomod Dios ni rienyibu».

Tzón mbioxhlas hebreoscu goloʼyibu guicyibu guisobyibu Jehová ñac nitisi ñac. ¿Nainy gaclo xomod layibu la?