Diewor moko, Nebukadnezar uleko lek ma ng’oyo ndiri. E elwong’o jururieko mi ng’om pare kara gituc ire thelembene. Ento ng’atu acel de mbe m’i kindgi ma romo koro the lek pare. I ng’eye, ubimo ugam uyero ni Daniel.

Nebukadnezar uyero ni Daniel kumae: ‘I lek m’aleko, aneno yen ma dit, edongo ma bor, emulo kum polo. Yende romo nen kud i ng’om zoo. Ith yende leng’ man ecego nyinge dupa. Yedi beyom i the tipone, man winyo de gigiero odgi i jange. I ng’eye, malaika acel ugam uloro kud i polo. Ekok kumae: Ng’ond yende piny, lwer ithe de woko. Ento wek cudhone kud ulage i ng’om, man twii gwang’ mi nyunyu man mi mola i kume. Adunde yende bilokere tung’ kud adunde dhanu, adunde yedi bimiyere ire man nindo abiro bikadhu i wie. Dhanu ceke bing’eyo nia Mungu tie Jabim man eromo mio ker ni ng’atu ma ie yenyo.’

Yehova ugam unyutho the lekne ni Daniel. Kinde ma Daniel unyang’ i the lekne, e ndiri ugam ung’oi i ie. Ewacu kumae: ‘E ubimo, nwang’u lek maeni utimere ndhu i kum judegini, ento lundo ebitimere i kumi. Yen ma dit ma jung’ondo, utie in. Ker peri biweki man ibicamu lum tap calu yedi mi lum. Ento calu ma malaika uwacu juwek cudhone kud ulage udong’, ibidoko ubimo kendo.’

I ng’ei oro acel, Nebukadnezar ubino wotho iwi otker pare pi nineno leng’o mi Babeli. Ewacu kumae: ‘Wukenen adhura ma leng’ m’agiero. Wunen dwong’ para!’ Ma fodi eweco uthum de ngo ci, dwal moko uai i polo uwacu kumae: ‘Nebukadnezar, niai kawoni ker udaru weki.’

Ndhundhu saa nica, wii Nebukadnezar ugam unyothere man edoko calu yedi mi lum. Jurieme kud i otker pare man ecaku kwo ku yedi. Yuk wii Nebukadnezar udongo boco boco calu yuk acur man lwete uwobo ve lwet winyo.

 Kinde ma oro abiro ukadhu, wii Nebukadnezar ugam ulero man Yehova ukethe kendo ni ubimo mi Babeli. E Nebukadnezar uyero kumae: ‘Abepaku Yehova, Ubimo m’i polo. Kawoni ang’eyo nia Yehova utie Jabim. Ejwigo ju m’uting’iri man ecopo mio ker ni ng’atu ma ie yenyo.’