Mä arumajja, Nabucodonosor reyejj mayj samkasïna, ukasti wal llakisiyäna. Ukatwa samkajj kamsañs muni uk qhanañchapjjañapatakejj yatiñan jaqenakapar jawsthapïna, ukampis janiw khitis qhanañchañ puedkänti. Qheparojj Daniel profetaruw reyejj parläna.

Reyejj Danielar akham sänwa: ‘Samkajanjja mä jachʼa árbol uñjta, ukasti alajjpachkamaw jilsüna. Taqe cheqat uñjkayarakïnwa. Suma laphinakani, walja frutanakani ukhamänwa. Animalanakas chʼiwiparuw jutapjjäna, jamachʼinakas ramanakapanwa tapachasipjjäna. Ukatjja mä angelaw alajjpachat saraqanisajj akham artʼäna: “¡Aka arboljja liwinukupjjam, ramanakapsa apaqapjjarakim! Ukampis troncopsa saphipsa pachpa oraqer jaytapjjam. Hierrota cobreta lurat cinturonampi ñachʼantapjjarakim. Arbolan chuymapajj mayjtʼaniwa. Janirakiw jaqen chuymapjamäjjaniti, jan ukasti animalan chuymapjamäjjaniwa. Paqallqo tiemponakaw ukhaman uñjasini. Diosaw jachʼa Apnaqerejja, khitirutejj jupajj reino churañ munki ukaruw churi, ukanaksa taqeniw yatipjjarakini” sasa’.

Uka samkajj kamsañsa muni ukjja Jehová Diosaw Danielar qhanañchäna. Danielajj uk yatïna ukhajj wal sustjasïna, akham sarakïnwa: ‘Jachʼa rey, kuntï uka samkajj sañ munki ukajj enemigonakamjjar purispa ukaw walïspajja, ukampis jumaruw ukajj pasätam. Liwsupkäna uka jachʼa arbolajj jumätawa. Reinomjja apaqapjjätamwa, salvaje animalanakjamaw chʼojjña alinak manqʼjjäta. Ukampis angelajj “troncompi saphipampi jaytapjjam” sänwa. Ukajj wasitampiw reyëjjäta sañwa munaraki’ sasa.

Mä maratjja Nabucodonosor reyejj palaciop patjjanwa sarnaqaskäna. Babilonia markar uñtasajj wal musparäna. Akham sarakïnwa: ‘¡Babiloniajj wali jachʼawa! ¡Chʼamajampiw uk lurta! ¡Janiw khitis nayjamajj utjkiti!’ sasa. Ukham parlaskäna ukhajja, alajjpachatwa akham sanïna: ‘¡Nabucodonosor! Reinomajj janiw jumankjjeti’ sasa.

Ukaratpachaw Nabucodonosor reyejj loqherjjäna, salvaje animalar uñtataw tukjjäna. Palaciopatjja alisnukjjapjjänwa, animalanakampiw jakjjarakïna. Ñikʼutapajj paka jamachʼin phuyunakapjamänwa, sillunakapasti  jamachʼinakan sillunakapjam wali jachʼanakaw jilantjjarakïna.

Paqallq mara pasatatwa Nabucodonosorajj waliptjjäna, Jehová Diosajj wasitampiw Babilonian reyipat uttʼayjjäna. Ukatwa Nabucodonosorajj akham säna: ‘Alajjpachankiri Jehová Diosarojj wal jachʼañchta. Jupajj jachʼa jachʼa tukurinakarojj jiskʼachiwa. Jichhajj yatjjtwa, Jupaw jachʼa Apnaqerejja, khitirutï reino churañ munki ukaruw churaraki’ sasa.