U wada, Nébukadnézar a bi emel eem i bi kônha nye woñi. A sébél bôt bé ba pék le ba koblene nye yo. Ndi kiki mut to wada a bi la bé kobol yo, a sôk a sébél Daniel.

A kal Daniel le: ‘Me ñemel e yada. I e i, i bi nañ kayéle i tihbaga ngii. To numbe homa mut a bé a téé hana nkoñ isi, a bé le a tehe yo. I bééna tjai dilam ni ngandak matam. Binuga bi bé solbene i si yé, dinuni ki, di oñok mumbul map i mintjep nwé. Ndi añgel yada i lôl ngii, i kal le: “Kega e ini, ni kit ki mintjep nwé. Ndi, yéga kumul ni minkañ nwé ha isi, ni band yaga yo ni béndél i éña (tole kei) ni i mamuna. Ñem u e, u ga héñha, le u ba ha bañ ñem u mut binam, ndi ñem u nuga won u tina nye letee ngéda isaambok i tagbe nye ngii. Bôt bobasôna ba ga yimbe le, Nyambe nyen a yé Ñane, ni le ane, a nti yo tonjee a ngwés.”’

Yéhôva a soolene Daniel ngobol i eem. Kiki Daniel a nok ngobol yé, a kon woñi. A kal le: ‘A kiñe, me bak le me gwés le ini eem i ba inyu baoo boñ, ndi wen hala a mbéñge. Soso e i i bi kéga, we nu. W’a nimis ane yoñ, u je ki bikai kiki nuga bikai. Ndi inyule añgel i bi kal le ba nwas kumul ni minkañ nwé, u ga témb u yila kiñe.’

Mbus nwii wada, ngéda Nébukadnézar a bé hiôm mu tegep nyôl i yale yé, a memlege Babilôn. A kal le: ‘Béñgnana ni bilama bi tison ini me bi oñ. Béñgnana lipémba jem!’ Nye ngi mal pot, kiñ i lôl i ngii, i kal le: ‘A Nébukadnézar! Nano ngéda i nkola le u nimis ane yoñ.’

Nlélém ngéda, Nébukadnézar a nimis yi yé, a yila kiki nuga bikai. A bé nyégsaga i yék yale yé inyu ke niñ lôñni binuga bi bikai. Tjôñ di Nébukadnézar di put nye wengoñle tjimba di minyôgôl, gwalak gwé ki bi ap wee gwalak bi dinuni.

 Mbus nwii minsaambok, Nébukadnézar a témbna yi, ni Yéhôva a témb a téé nye kiñe Babilôn. Ha nyen Nébukadnézar a kal le: ‘Me mbégés Yéhôva, Kiñe i ngii yosôna. Nano, me nyi le Yéhôva nyen a ñénél kiki Nwet. A nsuhul ba ba nhumbul nyuu; ane ki, a nla ti yo tonjee a ngwés.’