Sarong banggi, may nakakatakot na pangaturugan si Nabucodonosor. Ipinaapod niya an madudunong na mga lalaki sa Babilonya para ipaliwanag an kahulugan kaiyan. Pero mayo saindang makapaliwanag kaiyan kaya nakipag-ulay siya ki Daniel.

Sinabi ni Nabucodonosor ki Daniel: ‘Sa pangaturugan ko, nakahiling ako nin sarong kahoy na luminangkawon sagkod sa langit. Mahihiling iyan maski sain na parte kan daga. May magagayon iyan na dahon saka dakulon na bunga. Nagpapahingalo sa limpoy kaiyan an mga hayop, asin naggigibo nin mga salagan sa mga sanga kaiyan an mga gamgam. * Dangan may anghel na nagbaba hali sa langit. Nagsabi ini: “Paluda an kahoy asin purutula an mga sanga. Pero itada sa daga an pungo kaiyan kaiba an mga gamot, dangan gakudan iyan nin lansang asin tanso. An puso kan kahoy mababago, imbes na sa tawo, magigi iyan puso nin hayop, asin pitong panahon an papalihison diyan. Maaaraman kan gabos na tawo na an Diyos an Tagapamahala asin na kaya niyang magtao nin kahadian sa kiisay man na gusto niya.”’

Ihinayag ni Jehova ki Daniel an kahulugan kan pangaturugan. Natakot siya tapos nagsabi: ‘O hadi, gusto ko kuta, sa mga kaiwal mo mangyari an kahulugan kan pangaturugan, pero saimo ini mangyayari. Ika an dakulaon na kahoy na pinalod. Mawawara saimo an kahadian mo. Masabsab ka nin duot sa kapatagan na garo layas na hayop. Pero dahil sinabi kan anghel na pabayaan an pungo kaiyan kaiba an mga gamot, magigin hadi ka giraray.’

Pakalihis nin sarong taon, naglalakaw-lakaw si Nabucodonosor sa patag na atop kan saiyang palasyo asin inuumaw niya an Babilonya. Nagsabi siya: ‘Magayunon ining siyudad na pinatindog ko. Matibayon talaga ako!’ Kan nagtataram pa siya, sarong boses hali sa langit an nagsabi: ‘Nabucodonosor! Hinali na saimo an kahadian mo.’

Bigla na sanang nawara sa tultol na pag-iisip si Nabucodonosor asin nagi siyang garo layas na hayop. Pinahali siya sa palasyo asin namuhay kaiba kan mga layas na hayop. Luminaba an saiyang buhok arog sa  balukag nin agila, asin an saiyang mga kuko nagin arog sa kuko nin gamgam.

Pakalihis nin pitong taon, nagin normal giraray si Nabucodonosor asin ginibo siya ni Jehova na hadi kan Babilonya. Dangan nagsabi si Nabucodonosor: ‘Inuumaw ko si Jehova, an Hadi kan kalangitan. Aram ko na ngunyan na si Jehova an Tagapamahala. Ibinababa niya an mga mahambog, asin kaya niyang magtao nin kahadian sa kiisay man na gusto niya.’