Loon dɔ sufɛ, Nebukadnezar ye siko dɔ kɛ min be mɔgɔ siran. A y’a ka lɔnnikɛlaw weele ka na a kɔrɔ fɔ ale ye. Nka u si ma se k’a ka siko kɔrɔ fɔ. A laban, masacɛ kumana Daniyɛli fɛ.

Nebukadnezar y’a fɔ Daniyɛli ye ko: ‘Ne ka siko la, ne ye yiri dɔ ye. A janyana fɔɔ ka se sankolo ma. I be dugukolo yɔrɔ o yɔrɔ, i be se k’a ye. A ka furaburuw cɛ ka ɲi ani deen caaman be sɔrɔ a kan. Bɛgɛnw ni kongosogow be lafiɲɛ a suma jukɔrɔ ani kɔnɔw b’u ka ɲagaw la a bolow kan. O kɔ, mɛlɛkɛ dɔ jigira ka bɔ sankolo la. A pɛrɛnna ko: “A’ ye yiri nin tigɛ ka ben ani k’a bolow tigɛ tigɛ. Nka a’ y’a juu n’a liliw to bɔgɔ kɔnɔ ani a’ ye nɛgɛ jɔlɔkɔ ni nsiranɛgɛ jɔlɔkɔ kɛ k’a siri. U bena adamaden dusukun bɔ a la ka bɛgɛn dusukun di a ma ani wagati wolonfila bena tɛmɛ a kan. Bɛɛ bena a lɔn ko Ala lo ye Kuntigi ye ani ko a ka di a ye ka masaya di min ma, a be se k’a di o tigi ma.”’

Jehova ye siko nin kɔrɔ yira Daniyɛli la. Daniyɛli y’o siko kɔrɔ lɔn minkɛ, a siranna. A ko: ‘Eh masacɛ, ne tun b’a fɛ o siko ka ɲɛsin i juguw ma, nka a ɲɛsinna ele lo ma. Yiriba min tigɛra ka ben, o ye e lo ye. I bena bɔnɛ i ka masaya la ani i bena biin dumu kongo la i n’a fɔ kongosogo. Nka komi mɛlɛkɛ ko u ka yiri juu n’a liliw to bɔgɔ kɔnɔ, i bena kɔsegi masaya la.’

Saan kelen o kɔ, Nebukadnezar tun be yaalala a ka masaso sanbon kan n’a be Babilonɛ dugu filɛra ni ninsɔndiya ye. A ko: ‘Dugu cɛɲumanba nin filɛ ne ye min lɔ. Ne tɛ mɔgɔ dennin ye dɛ!’ K’a to kuma na, kumakan dɔ bɔra sankolo la ko: ‘Nebukadnezar! Sisan kɔni, i ka masaya bɔsira i bolo.’

O tuma na, Nebukadnezar kuun wulila ani a yɛlɛmana ka kɛ i n’a fɔ kongosogo. A waajibiyara ka bɔ a ka masaso la ka taga to kongo la ni kongosogow ye. A kunsigiw janyana i ko bɔɔn sii ani a sɔnniw tun be i ko kɔnɔw ta.

Saan wolonfila tɛmɛnin kɔ, Nebukadnezar yɛlɛmana ka  kɛ mɔgɔ ɲanaman ye tugun ani Jehova y’a kɛ Babilonɛ masacɛ ye. O kɔ, Nebukadnezar ko: ‘Ne be sankolo Masa Jehova tando. Sisan kɔni, ne y’a lɔn ko Jehova lo ye Kuntigi ye. Minw b’u yɛrɛ bonya, a b’u majigi ani a ka di a ye ka masaya di min ma, a be se k’a di o tigi ma.’