Ena dua na bogi, e tadra o Nepukanesa e dua na ka vakarerevaki. E kacivi ira nona tamata vuku mera vakamacalataka na kena ibalebale, ia e sega ni dua e vakamacalataka rawa. Oti e qai tarogi Taniela.

E kaya vei Taniela o Nepukanesa: ‘Au tadra e dua na vunikau, na kena cere e yaco sara i lomalagi. E rawa ni laurai mai na veivanua kece e vuravura. E rairai vinaka na drauna, e levu tale ga na vuana. Era mai vakaruru kina na manumanu, era vakasova e tabana na manumanuvuka. E qai lako sobu mai lomalagi e dua na agilosi, e kacivaka: “Me lauta na vunikau, me musu laivi tale ga na tabana. Ia me vo ga na vuna kei na wakana ena loma ni qele, me vesu wavoki kina na wa kaukamea kei na kopa. Ena kau tani mai na vunikau na yalo ni tamata, ena soli vua na yalo ni manumanu, me oti mada e vitu na gauna. Era na qai kila na tamata kece ni Cecere duadua ga na Kalou, ena solia tale ga na matanitu vua e vinakata.”’

E qai vakaraitaka vei Taniela o Jiova na ibalebale ni tadra. E rere sara ga o Taniela ni kila na kena ibalebale, e kaya: ‘Kemuni na tui, me yacovi ira ga na kemuni meca na tadra qo, ia qo e baleti kemuni. O kemuni sara ga na vunikau levu e lauta ya. Ena kau tani na nomuni matanitu, oni na kana co e tautuba me vaka na manumanu ni vanua. Ia oni na tui tale ni kaya na agilosi me tu ga na vuna kei na wakana.’

Ena yabaki tarava, ni taubale tiko o Nepukanesa ena dela ni nona vale, e vaqoroqoroi Papiloni tiko. E kaya: ‘Raica mada na koro totoka au tara. Sa dua na ka o yau!’ Ni se vosa tiko, e rogo mai lomalagi e dua na domo: ‘Nepukanesa! Sa kau tani vei iko na nomu matanitu.’

E veisau vakasauri na vakasama i Nepukanesa, sa vaka ga na manumanu ni vanua. E cemuri tani ena nona vale vakatui me  bula vata kei ira na manumanu. E balavu na drauniuluna me vaka na vuti ni ikeli, nona itaukuku e vaka na itaukuku ni manumanuvuka.

Oti e vitu na yabaki, e kilaiyalona tale o Nepukanesa. E digitaki koya o Jiova me tui Papiloni. E kaya sara o Nepukanesa: ‘Au vakacaucautaki Jiova na Tui ni lomalagi. Au sa qai kila qo ni Cecere ga o Jiova. E vakamaduataki ira na dokadoka, e solia tale ga na matanitu vua e vinakata.’