Soʼu wanee ai, aʼlapüjaashi Nabucodonosor. Neenajitka na wayuu kekiikana maʼin süpüla nüküjain namüin kasapülajatüin tia. Isasü nachiki naküjain nümüin jamaluʼuluin shia. Mapa, asakinnüshi Daniel nutuma Nabucodonosor.

Nümaka Nabucodonosor nümüin Daniel: «Taʼlapüinruʼu teʼrüin nuuʼulia wanee wunuʼu miyoʼu maʼin antüsü sirumatuʼumüin. Eʼnnüsü shia wattajee maʼin. Wüitüsü maʼin nuuʼulia jee kachonsü maʼin. Eejatü mürüt jutkatüin seemioushi jee tü wüchiikalüirua akumajüsü shipia saaʼu. Nüshakataka teʼrüin wanee aapiee sirumatuʼujee sünain emetuluin nünüiki sünain maa: ‹Jushotta tü wunuʼukot sümaa tü sütünakalüirua. Juuʼulaajeerü shikiikat sümaa tü suuralakat. Jijittaa shia süka kachueera otta cobre. Suʼwanajaaka sukuwaʼipa tü wunuʼukot, nnojoluitpa müin aka saaʼin nukuwaʼipa wanee wayuu, müitpa aka saaʼin sukuwaʼipa wanee mürüt jashichi. Alatüinjatü akaratshi kaʼi saaʼu. Shiyaawateetka saaʼu wayuu süpüshuaʼa niain Jeʼwaa chi Aluwataakai saaʼu kasa süpüshuaʼa otta niain aneeküin chi eekai süpüla nuluwataweein nutuma›».

Nüküjaka Jeʼwaa nümüin Daniel jamaluʼuluin nüʼlapüin Nabucodonosor. Nütüjaapa saaʼu Daniel tia, ayoʼujaasü naaʼin. Anuu nünüiki: «Aluwataashikalee, kasataalejeseʼe shiain alatüin namüin na piʼipolokona tü alatajatkat pümüin. Tü wunuʼu ashottünakat, pia piakai. Asütüneerü puulia puluwataaya otta ekeechi pia mojuui maʼaka saaʼin mürüt. Wanaa sümaa nümüin chi aapieekai suuʼulaanüinjatüin shikii tü wunuʼukot sümaa tü suuralakat, shia nüküjeeka achiki aikalaweechin pia püchikuaʼa sünain aluwatawaa».

Wanee juya süchikijee tia, yalajachi Nabucodonosor iipünaa saaʼu nipia sümaa niirakaain sümüin Babilonia tü pueulo nukumajitkat. «Miyoʼu maʼin tü pueulo takumajitkat. ¡Atüjakaiche maʼin taya!», mataashi. Wanaa sümaa müin nünüiki, naapaka wanee pütchi iipünaajee sünain maa: «¡Nabucodonosor! Asütünüitpa puulia tü puluwataayakat».

Soʼujeʼereʼeya kaʼikat tia, amamainnajaasü nikii Nabucodonosor. Maaʼatshi aka saaʼin sukuwaʼipa mürüt. Ajünajaanüshi nia nipialuʼujee saʼakamüin tü mürüt wünaʼapüjatkalüirua. Maaʼatshi aka saaʼin wanee warulapai süka miyoʼuin maʼin tü nuʼwalakat otta müsia tü nüpatoʼukat, müsü aka saaʼin süpatoʼu wüchii.

 Sülatapa akaratshi juya süchikijee tia, anashi nüchikuaʼa Nabucodonosor otta nüikaleʼerüin nia Jeʼwaa nüchikuaʼa sünain aluwatawaa saaʼu Babilonia. Nümaka Nabucodonosor: «Jeʼwaakalee, taʼwaajüin pia süka piain Aluwataain chaa iipünaa otta saaʼu kasa süpüshuaʼa. Eʼrüshi japülii wanee wayuu putuma yaletüle naaʼin otta eeshi süpüla püneeküin chi eekai nuluwataweein putuma».