NUPINPLỌN 62
Ahọluduta He Taidi Atin Daho De
To zánmẹ gbèdopo, Nẹbukadnẹzali kudlọ he dobu de. E ylọ nuyọnẹntọ etọn lẹ pli, na yé nido dọ nuhe odlọ lọ zẹẹmẹdo na ẹn. Ṣigba, depope yetọn ma gán dọ nuhe odlọ etọn zẹẹmẹdo. To godo mẹ, ahọlu lọ wá dọho hẹ Daniẹli.
Nẹbukadnẹzali dọna Daniẹli dọmọ: ‘To odlọ ṣie mẹ, n’mọ atin de. E whẹ́n sọmọ bọ e yiji sọ́ olọn. E sọgan yin mimọ hlan sọn filẹpo to aigba ji. Amà etọn lẹ sọ yọ́npọ́n bọ e tindo sinsẹ́n susu. Kanlin lẹ nọ wá dín yẹtẹn to oglọ etọn, bọ ohẹ̀ lẹ nọ do adọ́ do alà etọn lẹ ji. Enẹgodo, angẹli de jẹte sọn olọn. E sọ dawhá dọmọ: “Mì sán atin lọ liai bo sán alà etọn lẹ sẹ̀. Amọ́, mì jo dodonu po adọ̀ etọn lẹ po do aigba mẹ bo ze kọgàn gànyuu po gànvẹẹ po tọn de plá okọ̀ na ẹn. Ahun atin lọ tọn na diọ sọn gbẹtọ tọn zun ahun kanlin tọn, bọ ojlẹ ṣinawe na juwayi gbọn e ji. Gbẹtọ lẹpo nasọ yọnẹn dọ Jiwheyẹwhe wẹ yin Gandutọ bo sọgan na ahọluduta de mẹdepope he jlo e.”’
Jehovah de nuhe odlọ lọ zẹẹmẹdo hia Daniẹli. To whenue Daniẹli yọ́n nuhe odlọ lọ zẹẹmẹdo, obu jẹ e ji. E dọmọ: ‘Ahọlu e, e na ko jlo mi dọ odlọ lọ ni mọ hẹndi do kẹntọ towe lẹ go, amọ́ hiẹ go wẹ e na mọ hẹndi do. Hiẹ wẹ atin daho he yin sinsánliai lọ. A na hẹn ahọluduta towe bu bo na dù amà to danji taidi gbekanlin de. Ṣigba, na angẹli lọ biọ dọ dodonu po adọ̀ lọ lẹ po ni yin jijodo wutu, a na gbẹsọ wá lẹzun ahọlu.’
To owhe dopo godo, Nẹbukadnẹzali to zọnlinzin to họta họ̀nmẹ etọn tọn bo to whanpẹ Babilọni tọn pọ́n. E dọmọ: ‘Pọ́n tòdaho whanpẹnọ ehe, he yẹn ko gbá. Pọ́n lehe n’klo do sọ!’ Dile e gbẹ́ to hodọ, ogbè de dọho sọn olọn mẹ dọmọ: ‘Nẹbukadnẹzali! Todin, ahọluduta towe ko yin yíyí sọn asi we.’
To whenẹnu, Nẹbukadnẹzali hùn tadu bo jẹ nuyiwa ji taidi gbekanlin de. E to dandannu glọ nado tọ́n sọn họ̀nmẹ etọn bo yì nọ danji hẹ gbekanlin lẹ. Oda Nẹbukadnẹzali tọn lẹ sọ wú bo dite taidi ofún akùn tọn lẹ bọ ofẹ̀n etọn lẹ taidi ofẹ̀n ohẹ̀ tọn lẹ.
To owhe ṣinawe godo, Nẹbukadnẹzali gọ̀ jẹgangan bọ Jehovah vọ́ hẹn ẹn zun ahọlu Babilọni tọn. To whenẹnu, Nẹbukadnẹzali dọmọ: ‘Yẹn pà Jehovah, Ahọlu olọn lẹ tọn. N’ko wá yọnẹn todin dọ Jehovah wẹ yin Gandutọ. E nọ whiwhẹ goyitọ lẹ, podọ e sọgan na ahọluduta de mẹdepope he jlo e.’
“Goyiyi wẹ nọ jẹnukọnna aijijẹ ajiji, podọ gbigbọ sakla tọn wẹ nọ jẹnukọnna ahlidida.”—Howhinwhẹn lẹ 16:18
A Gán Sọ Pọ́n Hosọ Ehelẹ
Whetẹnu Wẹ Ahọluduta Jiwheyẹwhe Tọn Jẹ Gandu Ji? (Apá 1)
Eyin a yọ́n gblọndo lọ, be a gán yí Biblu do basi zẹẹmẹ etọn na mẹdevo ya?
