Bati deu, Nabucodonosor köböbare yebätä kä jürä namani krubätebätä. Niara köböbare ye dre gärä nämene ye tö namani niemana jai, yebätä nitre töbätä nämene kwe ye käräbare kwe, akwa dre gärä nämene ye nitre ñaka mikani gare jire ie. Mrä rei blitabare Daniel ben.

Nabucodonosor niebare Daniel ie: ‘Kri dati ririaba nemen kä kwinbätä tikwe tuaba köböre. Kri ye rababa tuin kwin menteni. Kri ye kä nämä bä nuäre krubäte aune ngokwä nämä krubätebätä. Jondron nire yei kä nämä kwen ja dükara kri ye täni aune nukwä nämä ja juda mike kri ye küdebätä. Ye bitikäre, ángel kä kwinbätä jataba kuintubu aune ñäkäba kwe: ‘¡Kri ye nete tibien aune küde ye tikekä! Akwa kri ye dokwä tuenmetre ngätriebe. Aune jondron sribebare hierrore bätä cobrere yebiti kri ye dokwä mäke. Kri ye brukwä rikwitai. Brukwä ñaka rabai ni nire kwrere, ñakare aune brukwä rabai jondron nire kwrere. Aune kä näin kwä kükü ta. Nitre jökrä ie rabai gare Ngöbö aibe Gobranka aune niara törbadre nire tuai gobrane yei raba gobran ye bien’’.

Köbö ye dre gärä nämene ye Jehovakwe mikani gare Daniel ie. Köbö ye nükani gare Daniel ie angwane niara nikaninkä krubäte. Niebare kwe: ‘Rei mäkwe dre tuani köböre ye rabadre bare ni mä rüere yebätä näre, akwa ye rabai bare mäbätä. Kri kri tikaninkä ye abokän mä ara. Gobran ye riaite mäkän aune mäkwe mikä kwetai jondron nire känsenta ye kwrere. Akwa ángel niebare kri dokwä tuenmetre ngätriebe. Ye abokän mä rabaita reire bobukäreta’.

Kä nikani kwati ta ye bitikäre, Nabucodonosor nikani ju gobrankäre kwe ye dokwäte kwin nämene dikekä sekwäre aune nekwäre aune juta Babilonia yebätä niara töi namani ñan krütare. Niara niebare: ‘¡Tikwe juta ükaninte kwin krubäte! ¡Ni mada ñaka tärä ti kwrere!’. Niara nämene kukwe ye niere angwane, ni kukwei kä kwinbätä käkwe niebare ie: ‘¡Nabucodonosor! Gobran mäkwe ye nerate mäkän’.

Köbö ye ngwane, kä nikwitaninkä Nabucodonosor yebiti aune namani ja ngwen jondron nire känsenta ye kwrere. Aisete niara dianinkä kä gobrankäre ie yete aune namani nüne jondron nire känsenta ye kwrere. Niara dokwä drüen ririabare nga yebätä namani mü ngwike kä kwrere aune kisedaba ririabare nga krubäte nukwä kisedaba kwrere.

 Kä nikani kwä kükü ta ye bitikäre, Nabucodonosor namaninta ni metre ye erere aune Jehovakwe niara mikaninta reire Babilonia. Angwane, Nabucodonosor niebare: ‘Tita Jehová käikitekä, niara abokän Rei kä kwinbiti. Nitre bikaka krikri ye Jehová tä mike jakaire. Jehová abokän Gobranka nibira gare tie aune nirei niara törbadre gobran biain ye tä bien ie’.