Isa ka gab-i, may makahaladlok nga damgo si Nabocodonosor. Ginpatawag niya ang maalam nga mga lalaki para isugid sa iya ang buot silingon sini. Pero wala sa ila ang makapaathag sang iya damgo. Sang ulihi, nakighambal ang hari kay Daniel.

Si Nabocodonosor nagsiling kay Daniel: ‘Nakita ko sa akon damgo ang isa ka kahoy. Nagtaas ini asta nga nakalab-ot sa langit. Kitaon ini sa bilog nga duta. Matahom ang mga dahon sini kag madamo ini sing bunga. Ang mga sapat nagapahuway sa landong sini, kag ang mga pispis nagapamugad sa mga sanga sini. Dayon may anghel nga nanaug halin sa langit. Nagsinggit sia: “Tapsa ang kahoy, kag utda ang mga sanga sini. Pero pabay-i lang ang tuod sini sa duta, kag higti sing salsalon kag saway ang palibot sini. Ang tagipusuon sini nga iya sang tawo mangin tagipusuon sang sapat sa sulod sang pito ka tion. Mahibaluan sang tanan nga katawhan nga ang Dios amo ang Manuggahom kag mahatag niya ang ginharian sa kay bisan sin-o nga gusto niya.”’

Ginsugid ni Jehova kay Daniel ang buot silingon sang damgo. Sang naintiendihan ini ni Daniel, hinadlukan sia. Sia nagsiling: ‘O hari, kuntani ini nga damgo parte sa imo mga kaaway, pero parte ini sa imo. Ikaw ang daku nga kahoy nga gintapas. Kuhaon sa imo ang imo ginharian, kag magakaon ka sing hilamon sa latagon pareho sa ilahas nga mga sapat. Pero bangod ginbilin sang anghel ang tuod, mangin hari ka liwat.’

Pagligad sang isa ka tuig, nagalakatlakat si Nabocodonosor sa matapan nga bahin sang atop sang iya palasyo kag ginapahambog gid niya ang Babilonia. Sia nagsiling: ‘Tan-awa ining dalayawon nga siudad nga akon ginhimo. Gamhanan gid ako!’ Samtang nagahambal sia, may tingog halin sa langit nga nagsiling: ‘Nabocodonosor! Kuhaon sa imo subong ang imo ginharian.’

Sa sina mismo nga tion, nagbuang si Nabocodonosor kag nangin pareho sa ilahas nga sapat. Ginpahalin sia sa iya palasyo kag nangin kaupod niya sa latagon ang ilahas nga mga sapat. Naglaba ang buhok ni Nabocodonosor pareho sang bulbol sang agila kag ang iya mga kuko nangin pareho sa kuko sang pispis.

 Pagligad sang pito ka tuig, nangin normal liwat si Nabocodonosor kag ginhimo sia ni Jehova nga hari sang Babilonia. Dayon si Nabocodonosor nagsiling: ‘Ginadayaw ko si Jehova, ang Hari sang mga langit. Nahibaluan ko na subong nga si Jehova ang Manuggahom. Ginapaubos niya ang mga bugalon, kag mahatag niya ang ginharian sa kay bisan sin-o nga gusto niya.’