Mouṱuku umwe, Nebukadnesar wa ri noruroto oruhimise. Eye wa isana ovarumendu ve ozonongo kutja ve mu raere omaheero waro. Posiya kapari umwe ngwaa yenene okumukahururira oruroto rwe. Korusenina ombara ya hungira kuna Daniel.

Nebukadnesar wa raera Daniel na tja: ‘Moruroto rwandje mba muna omuti. Omuti mbwi we kura tjinene nga tji wa kavaza keyuru. Owo aau yenene okumunika okuza akuhe. Owo wa ri nomaso omawa omamanise novihape ovingi. Ovipuka vyokuti vya suva momuzire wawo nouzera wa tunga oviruwo mozondavi zawo. Okuzambo omuengeli wa rauka okuza keyuru, a ravaere na tja: “Kee omuti nu mu teye ozondavi zawo. Posiya otjiunda tjawo nomize vyawo vyeseye mehi nu mu twe ko ekwamo rotjitenda nongoporo nde tji kondoroka. Oure wozombura 7 omurumendu ngwi ke nokukara nomeripuriro womundu nungwari ma kara nomeripuriro wotjipuka. Ovandu avehe mave tjiwa kutja Ndjambi u nouvara kombanda yovandu nokutja ma yenene okuyandja ouvara mbwi ku auhe ngwa toorora.”’

Jehova wa tjivisa ku Daniel omaheero woruroto ndwi. Indu Daniel tja uta okuzuva oruroto ndwi nawa, eye wa hara emuma. Eye wa tja: ‘Muhona ombara, ami me zeri kutja oruroto ndwi ru notjiṋa novanavita na ove nu karu notjiṋa na ove. Omuti omunene mbwa kewa mau kuramene po ove. Ove mo pandjara ouhona woye, nu mo utu okurya ehozu mokuti tjimuna otjipuka. Posiya mena rokutja omuengeli wa tja otjiunda tjomuti nomize vyawo ngavi isiwe mehi, mape hee kutja ove mo rire ombara rukwao.’

Kombunda yombura imwe, Nebukadnesar aa kayenda komututu wondjuwo ye youhona ama tjaterwa i Babilon. Eye wa tja: ‘Tara kotjihuro otjinene tji mba tunga hi. Tara kouvara nomasa wandje!’ Ngunda ama hungire omambo nga, kwa hungira eraka okuza keyuru nda tja: ‘Mbara Nebukadnesar! Ouvara wouhona woye nambano mo yekewa.’

Oruveze ndwo, Nebukadnesar wa hipara ozondunge na sana kotjipuka. Eye wa rambwa mondjuwo ye youhona na kakara mokuti tjimuna otjipuka. Nebukadnesar wa hapa ozondjise ozonde  tjimuna omainya wonguvi nozonyara ze za rira ozonde tjimuna ozonyara zozonḓera.

Kombunda yozombura 7, ozondunge zaNebukadnesar za kotoka rukwao nu Jehova we mu ririsa ombara yaBabilon. Okuzambo Nebukadnesar wa tja: ‘Me tanga Ndjambi Ombara yEyuru. Nai me tjiwa kutja Muhona ongu ri ombara. Eye u susuparisa imba mbe ritongamisa nu u yandja ouhona we ku ingwi ngu ma vanga.’