Ba siti malam, Nebukadnesar bisi mimpi ti balat ngenakutka. Iya ngangauka bala penyanding penemu nerangka reti mimpi nya. Tang nadai seiku ari sida ulih nerangka mimpi iya. Pengujung iya, raja bejaku enggau Daniel.

Nebukadnesar madah ngagai Daniel: ‘Ba mimpi aku, aku meda sepun kayu. Kayu nya majak tinggi nyentukka langit. Pun nya ulih dipeda semua mensia ba dunya tu. Daun iya manah sereta buah iya mayuh. Jelu belindung ba ayung pun, lalu burung ngaga sarang ba dan iya. Udah nya, seiku melikat nurun ari serega. Ku iya: “Tebang kayu nya, lalu tetak dan iya. Tang awakka tuga iya tinggal ba tanah, dibelit ngena belulang besi enggau temaga. Dalam kandang tujuh taun iya nadai agi ngembuan runding mensia, tang runding jelu. Semua orang deka nemu Petara nya Pemerintah lalu Iya ulih meri kuasa ngagai sebarang orang ke dipilih Iya.”’

Jehovah madahka Daniel reti mimpi nya. Lebuh Daniel nemu reti mimpi nya, iya nyadi takut. Iya madah: ‘Tuan Raja, naka meh pemanah enti sema mimpi enggau reti iya ditujuka ngagai bala munsuh nuan, lalu ukai ngagai nuan empu. Kayu besai ke ditebang nya nuan. Nuan deka lenyau perintah nuan, lalu deka makai rumput ba padang baka jelu babas. Tang ketegal melikat ngasuh ninggalka tuga ba tanah, nuan deka nyadi raja baru.’

Setaun udah nya, Nebukadnesar benung bejalai ba perabung istana iya, iya meda menua Babilon enggau ati ti temegah. Ku iya: ‘Peda meh pemanah nengeri ke udah digaga aku. Naka meh pemesai kuasa aku tu!’ Lebuh iya benung bejaku, siti nyawa bejaku ari serega: ‘Nebukadnesar! Diatu perintah nuan udah nadai.’

Tekala nya, Nebukadnesar nyadi gila lalu iya baka jelu babas. Iya diburu ari istana lalu diau enggau jelu babas ba padang. Buk iya mansang panjai baka bulu menaul, lalu kukut iya panjai baka kukut burung.

 Pengudah tujuh taun, Nebukadnesar badu agi gila lalu Jehovah ngaga iya nyadi raja menua Babilon. Ku Nebukadnesar bejaku: ‘Aku muji Jehovah, Raja serega. Diatu aku nemu Jehovah Pemerintah ti pemadu tinggi. Iya ngemaruhka orang ke sumbung lalu Iya meri kuasa perintah ngagai orang ke dipilih Iya.’