Mũthenya ũmwe ũtukũ, Nevukatilesa nĩwaotie ndoto ĩngĩ ya kũtelemya mũno. Nĩweetie andũ make ala oĩ mamũtavye kĩla ndoto ĩsu yoonanasya. Ĩndĩ vaiĩ ũmwe woo waĩ atonya kũmũelesya. Mũsumbĩ nĩwesie kũelesya Ndanieli ũndũ ũsu.

Nevukatilesa eeie Ndanieli atĩĩ: ‘Nĩ ndotonĩ, nonie mũtĩ. Mũtĩ ũsu wĩĩ mũasa mũno nginya ũkavika ĩtunĩ. O na wĩĩ ũtonya kwoneka nĩ mũndũ e kĩla vandũ ĩũlũ wa nthĩ. Mũtĩ ũsu wĩĩ na matũ maseo na matunda maingĩ. Nyamũ nikwonekaa ithũmũĩte ungu wa muunyĩ wawʼo na nyũnyi ikaka ndala mbongenĩ syawʼo. Na ĩndĩ mũlaĩka atheea kuma ĩtunĩ. Na asya: “Ũteme na ũitemanga mbonge syawʼo. Ĩndĩ ekana na ĩtina yawʼo vamwe na mĩi, vandũ va ũu yove na nyololo sya kĩaa na ũthuku. Ngoo ya mũtĩ ũsu ĩkaalyũka ĩeke kwĩkala ya mũndũ ĩndĩ ĩtwʼĩke ya nyamũ, na no nginya mavinda mũonza mavĩte. Andũ onthe makamanya kana Ngai nĩwe mũsumbĩki na kana no anenge ũsumbĩ mũndũ o wĩva ũla we ũkwenda.”’

Yeova nĩwamũtavisye Ndanieli kĩla ndoto ĩsu yoonanasya, na Ndanieli atelema mũno. Nĩvo ĩndĩ weeie mũsumbĩ: ‘Mwa mũsumbĩ, keka nĩvatonyeka ndoto ĩno ĩkakwata amaitha maku, ĩndĩ ĩneenete ĩũlũ waku. Nue mũtĩ ũla watemiwe. Ve ĩvinda yĩvika wume ũsumbĩnĩ waku, na ũkaya nyeki ta nyamũ ya kĩthekanĩ. Ĩndĩ, nũndũ mũlaĩka aisye ĩtina na mĩi itiwe, ũkatwʼĩka mũsumbĩ ĩngĩ.’

Mwaka ũmwe nĩwathelile kuma Nevukatilesa aota ndoto ĩsu. Na ĩndĩ mũthenya ũmwe Nevukatilesa esĩlĩte ĩũlũ wa nyũmba yake ya ũsumbĩ oona Mbaviloni yĩ nzeo mũno na asya: ‘Kwoona ũndũ ndũa ĩno naakie ĩseũvĩtye. Nyie ko nde mũnene.’ Aendeee kũneena, wasya nĩweewʼĩkie kuma ĩtunĩ ũyasya: ‘Nevukatilesa. Yu nĩwavenwa ũsumbĩ waku.’

Ndatĩkanĩ ĩsu, Nevukatilesa nĩwathũkie mũtwe na ekala nyamũ ya kĩthekanĩ. Kwoou nĩwaumie nyũmbanĩ yake ya ũsumbĩ na athi kwĩkala na nyamũ sya kĩthekanĩ. Nzwʼĩĩ ya Nevukatilesa nĩyanenevie yeana mawʼĩa ma ndiũ, na mbwaa syake syekala sya nyũnyi.

 Ĩtina wa myaka mũonza, Nevukatilesa nĩwavoie na Yeova amũtwʼĩkĩthya mũsumbĩ wa Mbaviloni ĩngĩ. Nĩvo ĩndĩ Nevukatilesa waisye: ‘Nĩngũmũtaĩa Yeova Ngai wa ĩtunĩ. Yu nĩnamanya kana Yeova nĩ Mũsumbĩki. Nũtheeasya andũ ala menenevasya na nũnengae ũsumbĩ mũndũ ũla we ũkwenda.’