LISON 62
Un Reinu sima un arvi grandi
Un dia di noti, Nabukudunuzor sunha ku un kuza ki da-l medu. El txoma kes ómi di sabedoria pa fla-l kuzê ki se sonhu siginifikaba. Má ninhun di es ka konsigi splika-l se sonhu. Dipôs el manda txoma Daniel.
Nabukudunuzor fla Daniel: ‘Na nha sonhu N odja un arvi, ki kria tantu grandi ki el ta txigaba séu. Di kalker párti di Téra algen ta odjaba el. El tinha fódjas bunitu i txeu fruta. Animal ta diskansaba baxu di se sónbra i pasus ta fazeba ninhu na ses ramu. Dipôs ben un anju di Séu. El fla ku vós altu: ‘Nhos korta arvi ku se ramus. Má nhos dexa se toku ku raís na txon i poi un sintu di féru i kóbri na se vólta. Korason di arvi ta ben muda di korason di ómi pa korason di animal i ta pasa 7 ténpu. Tudu algen ta fika ta sabe ma Deus é Governanti i el ta da reinu pa ken ki el krê.’
Jeová fla Daniel kuzê ki sonhu siginifikaba. Kantu Daniel ntende sonhu el fika ku medu. El fla: ‘Ó rei, N ta gostaba pa kel sonhu li sérba sobri inimigus di nho, má el é sobri nho. Kel arvi grandi ki ta kortadu, é nho. Nho ta ben perde reinu i nho ta ben fika ta kume padja sima animal brabu. Má, dja ki anju fla pa dexa toku ku raís, kel-la krê fla ma nho ta ben bira rei otu bês.’
Un anu dipôs, Nabukudunuzor staba ta anda na terasu di se palásiu ta odja Babilónia. El fla: ‘Odja modi ki sidadi ki N faze é grandi i rei di bunitu. Odja modi ki mi é bon!’ Timenti el sta papiaba, un vós di Séu fla-l: ‘Nabukudunuzor! Bu ta perde bu reinu gósi.’
Na kel óra, Nabukudunuzor bira dodu i el fika sima un animal. Es tra-l di se palásiu i el bai vive ku animal brabu na kanpu. Kabélu di Nabukudunuzor fika kunpridu sima péna di ágia i se unhas bira sima unhas di pasu.
Dipôs di 7 anu, Nabukudunuzor fika dretu otu bês i Jeová faze-l rei di Babilónia. Nton Nabukudunuzor fla: ‘N ta lova Jeová ki é Rei di Séu. Gósi dja N sabe ma el é Governanti. El ta rabaxa kes algen ki é orgulhozu i el ta da reinu pa kenha ki el krê.’
‘Orgulhu ta ben antis di kéda i spritu di algen ki ta da pa bon antis di da topada.’ — Provérbios 16:18