Ũtukũ ũmwe Nebukadinezaru nĩ aarotire kĩroto kĩamũmakirie. Nĩ eetire andũ arĩa maamũtaũragĩra iroto nĩguo mamũtaũrĩre, no gũtirĩ o na ũmwe wao wahotire. Nĩ aacokire akĩaria na Danieli.

Nebukadinezaru eerire Danieli ũũ: ‘Kĩroto-inĩ gĩakwa nĩ ndonire mũtĩ waraihĩte nginya ũgakinya matu-inĩ. Naguo wonagwo kũndũ guothe thĩinĩ wa thĩ. Warĩ na mathangũ mathaka na matunda maingĩ. Nyamũ ciathiaga kũhurũka kĩĩruru-inĩ kĩaguo, nacio nyoni igaaka itara honge-inĩ ciaguo. Ngĩcoka ngĩona mũraika oka kuuma igũrũ na akiuga ũũ: “Temai mũtĩ ũyũ na mũũcehe honge ciaguo. Gĩthukĩ kĩaguo hamwe na mĩri itikamunywo, no gĩthukĩ kĩu kĩohwo na mũrĩnga wa kĩgera na gĩcango. Ngoro ya mũtĩ ũcio nĩ ĩgatiga gũtuĩka ta ya mũndũ no ĩtuĩke ta ya nyamũ, na ĩgũikara ũguo nginya mahinda mũgwanja mathire. Andũ othe nĩ makamenya atĩ Ngai nĩwe Mũthamaki na no aheane ũthamaki kũrĩ mũndũ o wothe angĩenda.”’

Jehova nĩ aguũrĩirie Danieli ũrĩa kĩroto kĩu kĩoigĩte. Rĩrĩa Danieli aataũkĩirũo nĩ kĩroto kĩu, nĩ aamakire mũno. Oigire ũũ: ‘Na arĩ korũo kĩroto kĩu gĩkoniĩ thũ ciaku wee mũthamaki ũyũ, ĩndĩ nĩwe gĩkoniĩ. Mũtĩ ũrĩa watemirũo nĩ we. Nĩ ũkũrũo nĩ ũthamaki waku, na ũrĩage nyeki o ta nyamũ ya gĩthaka. No tondũ mũraika oigire gĩthukĩ gĩtikamunywo, nĩ ũgaatuĩka mũthamaki rĩngĩ.’

Thutha wa ihinda rĩa mwaka ũmwe, Nebukadinezaru nĩ aathire gũceera igũrũ rĩa nyũmba yake akĩĩroragĩra Babuloni. Eeĩrire ũũ: ‘Githĩ rĩrĩ ti itũũra inene rĩrĩa ndĩyakĩire. Na githĩ ndikĩrĩ mũndũ mũnene!’ O hingo ĩyo aaragia, nĩ kwoimire mũgambo igũrũ na ũkiuga ũũ: ‘Nebukadinezaru! Rĩu wathani waku nĩ mũthiru.’

Nebukadinezaru orirũo nĩ meciria make o hĩndĩ ĩyo na agĩtuĩka ta nyamũ ya gĩthaka. Nĩ oimire nyũmba-inĩ yake na agĩthiĩ gũtũũrania na nyamũ cia gĩthaka. Njuĩrĩ yake yaraihire ĩkĩhaana ta mathagu ma ndiyũ, nacio ndwara ciake ciahanaga cia nyoni.

 Mĩaka mũgwanja yathira, Nebukadinezaru nĩ aacokereirũo nĩ meciria make na Jehova akĩmũtua mũthamaki wa Babuloni rĩngĩ. Oigire ũũ: ‘Nĩ ngũgooca Jehova Mũthamaki wa igũrũ. Rĩu nĩ menyete atĩ nĩwe Mũthamaki. Nĩ atũmaga andũ arĩa etĩi menyihie na no aheane ũthamaki kũrĩ mũndũ ũrĩa angĩenda.’