Oufiku umwe, Nebukadnesar okwa li a twa ondjodi itilifa. Okwa li a ifana ovanongo vaye opo ve mu lombwele kutya otai ti shike. Ashike kapa li nande oumwe a dula oku i fatulula. Hauxuuninwa, ohamba oya li ya popya naDaniel.

Nebukadnesar okwa li a lombwela Daniel ta ti: “Mondjodi yange, onda mona mo omuti tau kulu wa yuka pombada fiyo wa twa meulu. Owa li tau dulu okumonika kukeshe umwe kombada yedu. Owa li u na omafo mawa noiimati ihapu. Oinamwenyo ohai kala ya omba momudile wao, noudila ohava tungu oihadi yavo koitai yomuti oo. Opo nee omweengeli okwa dja meulu ndele ta ti: ‘Kei po omuti ou, ndele tamu tete ko oitai yao. Ashike oshifidi nomidi dasho nadi fyaale medu, sha mangwa nomalyenge oivela ilaula naitwima. Omutima womuti otau ka shituka omutima womunhu nomutima womunhu otau ka shituka omutima woshifitukuti ndele tapa piti omafimbo aheyali. Ovanhu aveshe otava ka shiiva kutya Kalunga oye Omupangeli nota dulu okuyandja ouhamba waye kwaau a hala.’”

Jehova okwa hololela Daniel kutya ondjodi oyo otai ti shike. Eshi Daniel a uda ko efatululo londjodi oyo, okwa li a tila. Opo nee okwa tya: ‘Ohamba, onda li ndi shii ngeno ondjodi oi na sha novatondi voye, ashike oove tai popi. Omuti munene oo wa kewa po oove. Oto ka kanifa ouhamba woye, noto ka lya omwiidi moixwa ngaashi ashike oifitukuti. Molwaashi omweengeli okwa ti oshifidi nomidi dasho nadi fyaale medu, oto ka ninga ohamba natango.’

Konima yodula, Nebukadnesar okwa li ta ende kombada yongulu youhamba waye, ta tale ewapalo laBabilon. Okwa ti: ‘Taleni ame eshi nda tungifa oshilando shinene naashi nda tumbala.’ Fimbo ta popi, meulu omwa dja ondaka tai ti: ‘Nebukadnesar, paife ouhamba owe u kufwa.’

Pefimbo opo tuu opo, Nebukadnesar okwa ninga omupwidi ndele ta kala a fa oifitukuti yomoixwa. Okwa li a fininikwa opo a fiye po eumbo louhamba noku ka kala noifitukuti yomoixwa. Opo nee eexwiki daNebukadnesar oda kula ndele tadi ningi dile da fa omalwenya onhwa, noipanyala yaye ngaashi oipanyala yeedila.

 Eshi pa pita omido heyali, Nebukadnesar okwa li a lunduluka ndele ta kala e li ngaashi a li nale, na Jehova okwe mu ninga ohamba yaBabilon. Opo nee Nebukadnesar okwa ti: ‘Ohandi pandula Jehova, ohamba yomaulu. Paife ondi shi shii kutya Jehova oye Omupangeli. Oha ninipike ovo ve na ounhwa, nota dulu okuyandja ouhamba kwaao a hala.’