Kiro kighuma, Nebukadeneza mwalhotha esyonzoli esya mwitha obuba. Mwabirikira abalhume biwe b’amenge erisyamusoborera ekya sikamanyisaya. Muhathabanika n’oyukathoka erisisoborera. Erighunzerera, omwami mwabwira Danieli.

Nebukadeneza mwabwira Danieli athi: ‘Omw’ilhotha lyaghe, Munganalhangira omuthi. Obuuli bwagho ibuhikire omwa kyanya. Iniakalhangirirawa ehosi-hosi omwa kihugho. Aby’awithe ebikoma ebyuwene n’ebighuma bingyi. Ebisoro ibikahumulira omwa kitsutsu kyagho, esyonyonyi isikahimba omwa mithahi yawu mw’esyonyuthu. Neryo omumalaika mwakima erilhua elhubulha. Mwabirikira athi, Mukonde omuthi, muthwe n’emithahi yagho. Nikwa muleke ekisiki n’emirihi yagho omwa kithaka, neryo muhire omuliki w’ekyuma n’omulinga kukyo. N’omuthima w’omuthi akendi hinduka inialeka eribya w’omundu iniabya w’ekisoro, n’emighulhu musanju yikendi lhaba kugho. Abandu bosi bakendi minya ngoku Nyamuhanga ni Muthabali kandi ngoku anganaha obwami oko wosi-wosi oyo anzire.’

Yehova mwabisulira Danieli ekya syonzoli esyo syamanyisaya. Danieli abere akayitheghererya esyonzoli, mwakwa buba. Mwabugha athi: ‘Mwami, ngalhue ngalengekania indi esyonzoli esi sihambire okwa syonzighu syawu, aliwe si hambire okw’iwe. Omuthi omunene owakondawa n’iwe. Wukendi herya obwami bwawu, kandi wukend’irya ebithi ng’ekisoro ky’omoli. Aliwe kundi omumalaika mwabughire athi wuleke ekisiki n’emirihi, wukendi syabya mwami kandi.’

Enyuma w’omwaka mughuma, Nebukadeneza mwalendera okwa lhuthwe lhw’ekikali kiwe, iniane musamalira e Babeli. Mwabugha athi: ‘Lhangira omuyi munene owuwene oyu owa nabirihimba. Lhangira ngoku ngawithe obuthoki!’ Abere ane mubugha ebyo, omulenge mwalhua elhubulha athi: ‘Nebukadeneza! Lino wamalhusibwako bwami bwawu.’

Okwa ndambi eyo, Nebukadeneza mwabya musire n’eribya ng’ekisoro ky’omoli. Mwalhusibwa omwa kikali kiwe n’eriyikalha n’ebisoro by’omoli. Esyonzwiri sya Nebukadeneza musyabya siri-siri  ng’ebipupa by’erisamba, n’esyonyalha siwe musyabya ng’ebinyalha by’esyonyonyi.

Habere halhaba myaka musanju, Nebukadeneza kandi mwabya ndeke, Yehova kandi amamuyira mwa mwami we Babeli. Neryo Nebukadeneza mwabugha athi: ‘Ngapipa Yehova, Omwami w’elhubulha. Lino namaminya ngoku Yehova ya Muthabali. Akakehaya abakayiheka, kandi anganaha obwami oko wosi-wosi oyo anzire.’