Wan nɛt Nɛbyukadnɛza drim wan drim we bin mek i rili fred. I kɔl in sɛnsman dɛn fɔ kam tɛl am wetin di drim min. Bɔt nɔn pan dɛn nɔ ebul fɔ tɛl am wetin in drim min. So di kiŋ tɔk to Daniɛl.

Nɛbyukadnɛza tɛl Daniɛl se: ‘Insay mi drim, a si wan stik. Di stik gro te i rich ɔp di skay. Yu go ebul fɔ si am ɛnisay we yu de na di wɔl. I gɛt fayn fayn lif dɛn ɛn bɔku bɔku frut dɛn. Animal dɛn de go ledɔm ɔnda in shed ɛn bɔd dɛn de mek dɛn os na in branch dɛn. Dɔn wan enjɛl kɔmɔt ɔp ɛvin ɛn kam dɔŋ. I ala se: “Kɔt di stik dɔŋ, ɛn kɔt in an dɛn ɔl. Bɔt lɛf di bɔtɔm say pan di stik wit di rut dɛn na di grɔn midul di yɔŋ gras na di fil, tay am wit ayɛn ɛn bras. Lɛ dɛn chenj in mɔtalman at to wayl animal at, ɛn lɛ sɛvin tɛm pas. So dat pipul dɛn we de alayv go no se na di Wan we De Pantap Ɔlman na in na di Rula na di kiŋdɔm fɔ mɔtalman ɛn i de gi am to ɛnibɔdi we i want.”’

Jiova tɛl Daniɛl wetin di drim min. We Daniɛl ɔndastand wetin di drim min, i rili fred. I se: ‘Wi kiŋ, i fɔ dɔn fayn if dis drim na bɔt yu ɛnimi dɛn bɔt di drim na bɔt yu. Di big stik we dɛn kɔt na yu. Yu go lɔs yu kiŋdɔm ɛn yu go it gras na di fil jɔs lɛk wayl animal dɛn. Bɔt bikɔs di enjɛl se dɛn fɔ lɛf di bɔtɔm say pan di stik wit di rut, afta sɔm tɛm yu go bi kiŋ bak.’

Afta wan ia, Nɛbyukadnɛza bin de waka na di flat ruf na in os, ɛn i bin de kɔle Babilɔn. I se: ‘Luk dis fayn fayn siti we a dɔn bil. Luk aw a pawaful!’ As i de tɔk, na in wan vɔys kɔmɔt na ɛvin ɛn tɛl am se: ‘Nɛbyukadnɛza! Naw yu dɔn lɔs yu kiŋdɔm.’

Da patikyula tɛm de, Nɛbyukadnɛza kres, ɛn i tan lɛk wayl animal. Dɛn bin fos am fɔ lɛf in os ɛn liv wit wayl animal dɛn na di fil. Nɛbyukadnɛza in ia bin gro ɛn lɔng lɛk igul in fɛda dɛn ɛn in finga ɛn tonel dɛn bin lɔng lɛk aw bɔd in nel dɛn kin lɔng.

 Afta we sɛvin ia dɔn pas, Nɛbyukadnɛza wɛl, ɛn Jiova mek i bi di kiŋ na Babilɔn bak. Dɔn Nɛbyukadnɛza tɔk se: ‘A de prez Jiova we na di Kiŋ na ɛvin. Na naw a no se na Jiova de rul. I de mek pipul dɛn we prawd ɔmbul dɛnsɛf, ɛn i de gi in kiŋdɔm to ɛnibɔdi we i want.’