Ichɔl pilɛ, mi Nɛbukanɛɛsa sɔl luaŋ, nduyɛ mi siooŋnde bii ndu tau. Mbo veelu wanaa nduaa kɔl kaluaa le ma tɛɛsial ndu nyɛ luaŋ maŋ ma sim ndo. Kɛ wana o wana tiuba mbo tɛɛsial ndu maŋ te. O mɛɛlulaŋ kpɔŋ, mbo dimul Daaniɛɛ a lɔma sɔlaŋ maŋ okɔɔ.

Mi Nɛbukanɛɛsa dimul Daaniɛɛ aa: ‘I wa I hini, mi sɔl luaŋ, mi cha yɔmndo. Mi yɔmndo hoo lo bandei haaa mbo fuuluu o hala di. Wanaa wa ba o ba fee o chieeŋndo choo ma che ndu. Yɔmndo hoo wa o puiyaa yukɔŋ, nduyɛ ndoo kom tau. Visiaa wa pɛŋgioo o wunduma nduaŋ bɛŋgu, nduyɛ youwa wa waaŋnde taŋgullo o lɛuwuŋ ndɔŋ. Okoŋ, mi maalikɛinɔ Mɛlɛkaa fula choo choo mbo deŋi aa: “La kioŋ yɔmndo hoo mbo del. Nduyɛ mi la kili kili lɛuwuŋ ndɔŋ kpou. Kɛ mi la mal chiyii yɔmndo hoo a puunduŋ ndɔŋ ŋ luɛiyaa lɛŋ lende a bil puiyaa ndi o balaa. Nduyɛ mi la toosiaa nyɔɔŋ maa ŋdoluŋ a chiliŋii bulɔŋsiiye, le chiyii yɔmndo hoo dɔwɔɔ o kpiɔɔ. Waŋndo hoo, le wɔsilaŋ la ŋɔmmɛu, yiyaŋ iwana chieeya cho ndu fulaŋ niŋ, mi yiyaŋ ivisiyaa o miiŋgu ndu niŋ. Le mi waŋnda o chieeŋndo choo kpou a sina maa Mɛlɛka Bɛndoo Kpou ndu nɔ kpaayaa lɛŋnde choo o chieeŋndo choo kpou ni. Maa wana o yeema le siiŋguuwo masa wo, ndu o siiŋguu masa ni.”’

Mi Chɛhowa chɔm Daaniɛɛ nyɛ luaŋ maŋ ma sim ndo. Mɛɛ Daaniɛɛ bii luaŋ maŋ bila, mi siooŋnde bii ndu tau. Mbo dimi aa: ‘Fallo Masaa, yaa yiyaŋ ko maa a yaamɔɔwaa numnda okɔɔ luaŋ maŋ ma sim ni. Kɛ a numpila okɔɔ kpeekpei ma cho ni. Yɔm bɛndu nda keŋ koŋ ndo sim le num. Masaleŋ le cho num hunɔɔ hiɔluŋ, ma de billo mɛɛ visiaa yonduaa a dia ndu yɛ. Kɛ le mɛɛ maalikɛinɔ Mɛlɛkaa dimi maa a mal chiyii yɔm koŋ a puunduŋ ndɔŋ yɛ, a cho vɛlɛ hunɔɔ simnɔŋ masa.’

Wɔsioo opilɛ okoŋ kɔɔli, Nɛbukanɛɛsa wa balɔɔ o chiɛi ndɔ lemasaa choo amaluaŋ, mbo wa Babilɔŋ mɛɛndaŋndo mi nyɔɔ hɛnaŋ ndu. Mbo dimi aa: ‘Tofawɔ chiee kɛndɛ kɛndɛ ya taŋgul lo. Nuawɔ se mɛɛ ya cho masa bɛndu yɛ!’ O lo suɛi lende, mi diomndo suaa o choo choo niŋ aa: ‘Nɛbukanɛɛsa! Masale numndeŋ le hɛluŋ num.’

O lepilɛ niŋ kpe, mi yiyaŋ iwana chieeyaa fulaŋ ndu niŋ, mbo simnuŋ maa visi yondo. Ma soli ndu o chiɛi ndɔ lemasaa niŋ, mbo kɔ wa yondoo niŋ nda visiaa. Mi yiinde bandu ndu naŋ chaa bɔɔla kowɔɔ ni. Nduyɛ  yɛmbɔŋ ndɔŋ wa naŋ chaa yɛmbɔŋ youwaa biyaa ni.

Wɔsilaŋ la ŋɔmmɛu okoŋ kɔɔli, mi Nɛbukanɛɛsa miiŋgu o ndupila niŋ, okoŋ mi Chɛhowa siiŋguu ndu masaa le Babilɔŋ. Mi Nɛbukanɛɛsa dimi aa: ‘I saŋgala Chɛhowa o cho Masaa o choo choo niŋndo. I sina niŋ maa Chɛhowa cho Masaa ni. Wanaa heeluŋ nda, mbo tusi nda. Nduyɛ wana o wana o yeema pɛ, ndu o ke masaleŋ ni.’