တၢ်မၤလိ ၆၂
သ့ၣ်ဖးဒိၣ်တထူၣ်လၢ ဘၣ်တၢ်ဒိလီၤအီၤလၢ ဘီမုၢ်အတၢ်ပၢတၢ်ပြး
ဘၣ်တနၤန့ၣ် စီၤပၤနဘူၤကးန့စၢ် မံမီၢ်တၢ်မံမီၢ်လၢအလီၤပျံၤလီၤဖုးတခါလီၤ. အဝဲကိးန့ၢ်ဝဲ အပှၤကူၣ်ဘၣ်ကူၣ်သ့တဖၣ် ဒ်သိးကတဲဘၣ်အီၤ အတၢ်မံမီၢ်အခီပညီလီၤ. ဘၣ်ဆၣ် အပှၤကူၣ်ဘၣ်ကူၣ်သ့တဖၣ် တဲဘၣ်အတၢ်မံမီၢ် အခီပညီတသ့နီတဂၤဘၣ်. လၢခံန့ၣ် စီၤပၤတဲဘၣ်ဝဲ ဝံဒၤနံးယ့လး ဘၣ်ဃးဒီး အတၢ်မံမီၢ်လီၤ.
စီၤပၤနဘူၤကးန့စၢ် တဲဘၣ်ဝံဒၤနံးယ့လးလၢ– ‘လၢယတၢ်မံမီၢ်အပူၤန့ၣ် ယထံၣ်သ့ၣ်တထူၣ်. ဒီးသ့ၣ်တထူၣ်အံၤ ဒိၣ်ထီၣ်ထီထီၣ်ဝဲတုၤလၢမူခိၣ်လီၤ. ဒီးပှၤအိၣ်လၢဟီၣ်ခိၣ်ဒီဘ့ၣ်န့ၣ် ထံၣ်ဘၣ်ဝဲသ့ၣ်တထူၣ်အံၤလီၤ. သ့ၣ်အံၤအိၣ်ဒီးအလၣ်လၢ အဃံလၤဒီးအသၣ်အိၣ်ဝဲအါမးလီၤ. တကးဒံးဘၣ် ဆၣ်ဖိကီၢ်ဖိတဖၣ် ဟဲအိၣ်ကဒုလၢအဖီလာ် ဒီးထိၣ်ဖိလံၣ်ဖိတဖၣ် တ့ထီၣ်အသွံလၢသ့ၣ်ဒ့တဖၣ်အလိၤလီၤ. ဝံၤဒီးမူခိၣ်ကလူးတဂၤ ဟဲလီၤလၢမူခိၣ်ဒီးတဲဝဲလၢ– “ကူာ်လီၤကွံာ် သ့ၣ်တထူၣ်အံၤ ဒီးကျီကွံာ်အဒ့ခဲလၢာ်တက့ၢ်. ဘၣ်ဆၣ် ပာ်တ့ၢ်သ့ၣ်အံၤအခိၣ်ဆၢၣ်လၢ ဟီၣ်ခိၣ်လိၤ ဒီးကျီၤဃာ်သ့ၣ်ခိၣ်ဆၢၣ်အံၤလၢ ထးသွဲဒီးတိၢ်သွဲတက့ၢ်. သ့ၣ်အသးတကဲ ပှၤကညီအသးလၢၤဘၣ်. သ့ၣ်အသးအံၤ ကကဲထီၣ်က့ၤဝဲ ဆၣ်ဖိကီၢ်ဖိအသး တုၤတၢ်ဆၢအလီၢ်နွံဘျီလဲၤပူၤကွံာ်ဝဲလီၤ. ပှၤကိးဂၤဒဲးကသ့ၣ်ညါဝဲလၢ ကစၢ်ယွၤမ့ၢ်ပှၤလၢ အပၢဘၣ်တၢ်လီၤ. ဒီးအဝဲမ့ၢ်အဲၣ်ဒိးလၢ ပှၤတဂၤဂၤကပၢတၢ်န့ၣ် အဝဲဟ့ၣ်လီၤဘီမုၢ်လၢ ပှၤတဂၤအံၤအစုပူၤသ့ဝဲလီၤ.”’
ယဟိဝၤယွၤ ဒုးသ့ၣ်ညါစီၤဒၤနံးယ့လးလၢ စီၤပၤအတၢ်မံမီၢ်အခီပညီလီၤ. ဖဲစီၤဒၤနံးယ့လး နၢ်ပၢၢ်ဝဲစီၤပၤအတၢ်မံမီၢ် အခီပညီအခါအဝဲပျံၤတၢ်ဒိၣ်မးလီၤ. အဝဲတဲဝဲလၢ– ‘အိစီၤပၤဧၢ ယမုၢ်လၢ်တၢ်လၢ နတၢ်မံမီၢ်အံၤ ကဘၣ်ဃးဒီးနဒုၣ်နဒါလီၤ. ဘၣ်ဆၣ် တၢ်မံမီၢ်အံၤဘၣ်ဃးဒီးနၤလီၤ. သ့ၣ်ထူၣ်ဖးဒိၣ်တထူၣ်လၢ တၢ်ကူာ်လီၤကွံာ်န့ၣ်မ့ၢ်နၤလီၤ. တၢ်ကထုးထီၣ်ကွံာ်နၤလၢ နဘီနမုၢ်အပူၤ ဒီးနကအီၣ်နီၣ်ဧိၤမံၤဧိၤလၢ တၢ်ပျီပူၤဒ်ဆၣ်ဖိကီၢ်ဖိအသိးလီၤ. ဘၣ်ဆၣ် ခီဖျိလၢမူခိၣ်ကလူးတဲဝဲလၢ တဘၣ်ထဲးထီၣ်ကွံာ်သ့ၣ်အခိၣ်ဆၢၣ် တဂ့ၤအဃိ လၢခံနကကဲထီၣ်ဘၣ်က့ၤ စီၤပၤလၢအသီတဘျီလီၤ.’
တၢ်ဆၢကတီၢ် ပူၤကွံာ်တနံၣ်ဝံၤအလီၢ်ခံ, ဘၣ်တနံၤန့ၣ် စီၤပၤနဘူၤကးန့စၢ် ဟးဝဲလၢအဟံၣ်ခိၣ် ဒီးကွၢ်စိလီၤဝဲဝ့ၢ်ဘၤဘူၤလိၣ်လီၤ. ဒီးအဝဲတဲဝဲလၢ– ‘ကွၢ် ဝ့ၢ်တဖျၢၣ်လၢ အလီၤဘီလီၤမုၢ်အံၤ, ယတ့ထီၣ်အီၤလီၤ. ယဖါဖၠဲးညါ.’ ဖဲစီၤပၤတဲတၢ်အခါ တၢ်ကလုၢ်သီၣ်ထီၣ်လၢမူခိၣ် ဒီးတဲဝဲလၢ– ‘စီၤပၤနဘူၤကးန့စၢ်ဧၢ ခဲအံၤတၢ်ကထုးထီၣ်ကွံာ်နၤလၢ နဘီနမုၢ်အပူၤလီၤ.’
ဖဲန့ၣ်အဆၢကတီၢ် စီၤပၤနဘူၤကးန့စၢ် ပျုၢ်ထီၣ်ဝဲဒီးကဲထီၣ်ဒ် ဆၣ်ဖိကီၢ်ဖိအသိးန့ၣ်လီၤ. ဝံၤဒီး ဘၣ်တၢ်နီဟးထီၣ်ကွံာ်အီၤလၢ အနီပူၤဒီးဘၣ်လဲၤအိၣ်ဝဲလၢ ဆၣ်ဖိကီၢ်ဖိအကျါလၢပျီပူၤန့ၣ်လီၤ. စီၤပၤနဘူၤကးန့စၢ် အခိၣ်ဆူၣ်ထီထီၣ်ဝဲ လီၤဂာ်ဒ်သိးဒီးလံာ်ကြီကြၣ်အဆူၣ်န့ၣ်လီၤ. ဒီးအစုမ့ၣ်ခီၣ်မ့ၣ်စ့ၢ်ကီးထီထီၣ်ဝဲ ဒ်ထိၣ်အစုမ့ၣ်ခီၣ်မ့ၣ်အသိးလီၤ.
ဖဲတၢ်ဆၢကတီၢ်လဲၤပူၤကွံာ် နွံနံၣ်ဝံၤအလီၢ်ခံန့ၣ် စီၤပၤနဘူၤကးန့စၢ် သ့ၣ်ညါလီၤက့ၤအသးဒီး ယဟိဝၤယွၤဒုးကဲထီၣ်က့ၤအီၤလၢ ဘၤဘူၤလိၣ်အစီၤပၤ ဒ်လၢညါအသိးလီၤ. ဖဲတၢ်မၤအသးဒီးအီၤဒ်န့ၣ် ဝံၤအလီၢ်ခံအဝဲတဲဝဲလၢ– ‘ယစံးထီၣ်ပတြၢၤ ယဟိဝၤယွၤလၢ အမ့ၢ်မူခိၣ်အစီၤပၤလီၤ. ခဲအံၤယသ့ၣ်ညါလၢယဟိဝၤယွၤ မ့ၢ်တၢ်ပၢအကစၢ်လီၤ. အဝဲဆီၣ်လီၤပှၤလၢ အပာ်ထီၣ်ထီသး ဒီးပှၤတဂၤဂၤလၢ အဝဲအဲၣ်ဒိးဟ့ၣ်လီၤဝဲဘီမုၢ်န့ၣ် ဟ့ၣ်လီၤဝဲသ့န့ၣ်လီၤ.’
“တၢ်ပာ်ထီၣ်ထီအသးန့ၣ် ဟဲဝဲလၢ တၢ်ဟးဂီၤအမဲာ်ညါ, ဒီးတၢ်ပာ်ကဖိအသးန့ၣ် ဟဲဝဲလၢ တၢ်လီၤဃံၤအမဲာ်ညါလီၤ.”—ကတိၤဒိ ၁၆:၁၈