Lumbu kimosi muna fuku, Nebukandesa walota ndozi yamwesa wonga. Wabokelesa akwa ngangu awonso kimana banzayisa e nsasa. Kansi, ke mosi ko muna yau walenda sasila e ndozi yayina. I bosi, o ntinu wabokela Daniele.

Nebukandesa wavovesa Daniele vo: ‘Muna ndozi yalotele, yamwene nti mosi. O nti wau wavonga yo lwaka yakuna zulu. Wamonekanga mu fulu yawonso ova nza. Wakala ye makaya mambote ye bundu yayingi. E bulu yavundilanga kuna nsi a nti wau, e nuni zatunganga e nzalwa muna tayi yandi. I bosi, mbasi mosi yakulumuka kuna zulu. Yavova vo: “Nukesa nti wau yo zenga tayi yandi. Kansi, nusisa e sinza ye mianzi miandi muna ntoto yo zinga kio kasu kia tadi ye nsongo. O ntim’a kiwuntu ukatulwa muna nti yo vewa ntim’a kibulu yavana kivioka kolo nsambwadi. O wantu awonso bezaya vo Nzambi i Mfumu, olenda vana kintinu kwa konso ona kazolele.”’

Yave wasengomona e nsas’a ndozi yayi kwa Daniele. Vava Daniele kabakula e ndozi yayi, wamona o wonga. Wavova vo: ‘E ntinu, edi yabenze vo e ndozi yayi i mu kuma kia mbeni zaku, kinga i mu kuma kiaku. O nti ampwena una wakeswa i ngeye. Katulwa okatulwa vana kunda kia kintinu, titi odia nze bulu ya mfuta. Kansi, wau vo mbasi wavova vo basisa sinza kia nti ye mianzi miandi, osinga vutulwa diaka vana kunda kia kintinu.’

Una vavioka mvu mosi, Nebukandesa wakangalanga kuna nludi a nzo andi yo sivika e mbanza Babele. Wavova vo: ‘Tala e mbanza yampwena yatunga. I ntinu anene kikilu!’ Ekolo kavovanga, ndinga yatuka kuna zulu yavova vo: ‘E Nebukandesa! Owau kintinu kiaku kikatukidi.’

Vana vau, Nebukandesa wavidisa zayi wandi, okitukidi nze bulu kia mfuta. Wavaika kuna lûmbu lwa ntinu yo kwenda zinga vamosi ye bulu ya mfuta. E nsuki za Nebukandesa zamena nga  nsala za ngo-ezulu, e zala yandi yakituka nze zala ya nuni.

Una vavioka mvu nsambwadi, o zayi wa Nebukandesa wavutuka, Yave wankitula diaka se ntinu a Babele. Nebukandesa wavova vo: ‘Ikembele e Yave wa Ntinu kuna zulu. Owau nzeye wo vo Yave i Mfumu. Okululanga akwa lulendo. Olenda vana kintinu kwa konso ona kazolele.’