Difuku dimo bufuku, Nebukaneza wālotele kilotwa kilenga moyo. Wāityija bantu bandi ba tunangu mwanda wa bamushintulwile’kyo. Inoko i kutupu nansha umo wābwenye kushintulula kilotwa kyandi. Ku mfulo, mulopwe wāsapwila’mo Danyele.

Nebukaneza wālombwele Danyele amba: ‘Mu kilotwa kyami namonenga’mo mutyi. Wadi ubalepa bininge ubafika ne mūlu. Wadi ubwanya kumonwa pa ntanda yonso. Wadi na mani mavwambile ne bipa bivule. Banyama badi bakōkolokwa mu mutalela wao, kadi byoni byadi byala manswa ku misambo yao. Kupwa, mwikeulu umo watūka panshi utamba mūlu. Waela lubila’mba: “Tētai mutyi, ketai misambo yao. Ino shiyai kitako na miji yakyo pa nshi, kadi kutai’ko nkano ya kyuma ne ya mukuba. Mutyima wakyo wa bu muntu walamunwe, kipebwe mutyima wa nyema, kadi bitatyi bisamba-bibidi bikipityile. Bantu bakayuka amba Leza i Muludiki ne amba ubwanya kupa yewa ense wasaka bulopwe.”’

Yehova wāsokwedile Danyele mushintulwila kino kilotwa. Danyele paāivwanije nshintulwilo ya kino kilotwa, wāzakele bininge. Wānenene amba: ‘A mulopwe, nadi nanga’mba kino kilotwa kitala balwana nobe, ino kikutala abe. Mutyi mukatampe watētwanga i abe. Usa kujimija bulopwe bobe, kadi ukadya biyombo mu ntanda pamo bwa nyama wa ntanda. Inoko mwikeulu byaanenanga kushiya kitako na miji yakyo, abe ukekala mulopwe monka.’

Mwaka umo pa kupita’po, Nebukaneza wādi winangija pa musaka mubatalale wa njibo yandi mikatakata, ubandila Babiloni. Kānena’mba: ‘Talai kino kibundi kilumbuluke kyonaubaka. Monai’po mombaile!’ Aye ukinena, diwi dyātamba mūlu kedinena’mba: ‘Nebukaneza! Pano ubajimija bulopwe bobe.’

Ponka na ponka, Nebukaneza ñeni yāmujina, wāikala pamo bwa nyama wa ntanda. Wāshiya ku bukomo yandi njibo mikatakata ne kukekala na banyama mu ntanda. Nywene ya Nebukaneza yālepele yaikala pamo bwa masala a mukebo, māla andi nao ālepa pamo bwa māla a byoni.

 Myaka isamba-ibidi pa kupita’po, Nebukaneza wāikala monka biyampe, Yehova wāmubikika monka bu mulopwe wa Babiloni. Penepo, Nebukaneza wānena’mba: ‘Natendela Yehova, Mulopwe wa mūlu. Pano nayuka’mba Yehova i Muludiki. Utūkijanga bantu ba mitatulo, kadi ubwanya kupa bulopwe yewa ense wasaka.’