LEZZJONI 62
Ħolma dwar siġra kbira
Darba waħda billejl, Nebukadnessar ħolom ħolma tal-biżaʼ. Hu sejjaħ għandu lill-irġiel għorrief tiegħu biex dawn jgħidulu x’kienet tfisser. Imma ħadd ma kien kapaċi jgħidlu xi tfisser il-ħolma. Fl-aħħar, is-sultan kellem lil Danjel.
Nebukadnessar qal lil Danjel: ‘Fil-ħolma tiegħi rajt siġra. Din tant kibret li għoliet sas-smewwiet u kienet tidher minn kullimkien. Kellha weraq sbieħ u ħafna frott. L-annimali kienu jmorru jistrieħu għad-dell tagħha, u l-għasafar kienu jagħmlu l-bejtiet tagħhom fuq il-friegħi tagħha. Imbagħad, anġlu niżel mis-sema u b’leħen għoli qal: “Qaċċtu s-siġra, u aqtgħu l-friegħi tagħha. Imma ħallu z-zokk tagħha bl-għeruq fl-art, u madwaru agħmlu ħoloq tal-ħadid u tar-ram aħmar. Il-qalb tas-siġra se tinbidel minn qalb taʼ bniedem għal dik t’annimal, u se tibqaʼ hekk għal sebaʼ żminijiet. In-nies kollha se jkunu jafu li Alla hu l-Mexxej u li jistaʼ jagħti t-tmexxija lil min irid hu.”’
Ġeħova wera lil Danjel x’kienet tfisser il-ħolma. Meta Danjel fehem il-ħolma beda jibżaʼ. Hu qal: ‘O sultan, nixtieq li din il-ħolma kienet dwar l-għedewwa tiegħek, imma din hi dwarek. Is-siġra kbira li ġiet imqaċċta hi int. Int se titlef it-tmexxija tiegħek, u se tiekol il-ħaxix bħal annimal tar-rabaʼ. Imma peress li l-anġlu qal biex jitħalla z-zokk tas-siġra bl-għeruq, dan ifisser li int se terġaʼ ssir sultan.’
Sena wara, Nebukadnessar kien miexi fuq il-bejt tal-palazz tiegħu, iħares u jitgħaxxaq b’Babilonja. Hu qal: ‘Ara x’belt tal-għaġeb irnexxieli nibni jien. Ara kemm jien b’saħħti!’ Dak il-ħin stess, instemaʼ leħen mis-sema li qal: ‘Nebukadnessar! Int għadek kif tlift it-tmexxija.’
F’dak il-mument, Nebukadnessar tilef moħħu u sar bħal annimal tar-rabaʼ. Hu ġie mkeċċi mill-palazz tiegħu u spiċċa jgħix fl-għelieqi mal-annimali l-oħra. Xagħru twal daqs ir-rix
tal-ajkli, u difrejh saru bħad-dwiefer tal-għasafar.Wara li għaddew sebaʼ snin, Nebukadnessar reġaʼ beda jaġixxi normali u Ġeħova għamlu sultan taʼ Babilonja. Imbagħad, Nebukadnessar qal: ‘Jien infaħħar lil Ġeħova, is-Sultan tas-smewwiet. Issa naf li Ġeħova hu l-Wieħed li jmexxi. Hu jumilja lin-nies kburin, u jagħti t-tmexxija lil min irid hu.’
“Qabel tisbita jkun hemm il-kburija, u qabel it-tfixkil ikun hemm spirtu supperv.”—Proverbji 16:18