Se youali, Nabucodonosor kitemijki se tlamantli tlen tlauel kimajmatik. Maske kinnotski nopa tlalnamikinij, amo aka uelki kiixtomilia tlen kitemijki. Yeka kinotski Daniel.

Nabucodonosor kiiljuik Daniel tlen kitemijki: “Nikitak se kuauitl moskaltik uan asito iluikak. Ipan nochi Tlaltipaktli ueliyayaj kiitaj nopa kuauitl. Kipixtoya yejyektsi ixiuiyo uan temakayaya miak itlajka. Nopaya moekauiliyayaj tlapialmej, uan totomej kichiuayayaj inintepasol ipan imajmakuayo. Teipa, se iluikaejketl temok tlen iluikak uan kiijtok: ‘¡Xijtsontekikaj nopa kuauitl uan xitsontekilikaj imajmakuayo! San xijkauakaj nopa kuatsomitl ika ineljuayo. Uan nopa kuatsomitl, xijtatakatsokaj ika tepostli. Iyolo nopa kuauitl mopatlas, uan ayokmo kipias iyolo tlen se maseuali, nama kipias iyolo tlen se tlapiali. Uan panos chikome xiuitl. Nochi kimatisej san toTeotsij Tlanauatia uan san ya uelis kitekimakas katli ya kinekis’”.

Jehová kiiljuik Daniel tlake kiijtosnekiyaya nopa temiktli. Kema Daniel kikuamachilik, momajmatik uan kiiljuik Nabucodonosor: “Totlanauatijka, maske nijnekiskia ma kinpano sekinok tlen titemijki, tlen tikitak, ta mitspanos. Ta tieli nopa ueyi kuauitl. Ayokmo titlanauatis uan tijkuas sakatl kej se tlapiali. Nopa kuatsomitl tlen kikajkej ika ineljuayo, kiijtosneki sampa titlanauatis”.

Kema panok se xiuitl, Nabucodonosor itstoya kalpani ipan ichaj kampa tlanauatiyaya uan kiitayaya nochi tlen kichijchijtoya ipan Babilonia. Uan kiijtok: “¡Tlauel yejyektsi nijchijtok ni altepetl! ¡San na tlauel niueyi!”. Kema kiijtouayaya nopa, kikajki se akajya ipan iluikak kiiljuik: “¡Nabucodonosor! Ta ayokmo titlanauatis”.

Uajka, Nabucodonosor yolpolijki o ayokmo tlalnamijki uan tlachiuayaya kej se tlapiali. Yeka kikixtijkej kampa tlanauatiyaya uan yajki kampa itstoyaj tlapialmej. Itsonkal moskaltik uan mochijki kej iijuiyo se kuajtli, uan iisti moskaltik kej ininisti totomej.

 Kema panok chikome xiuitl, Nabucodonosor sampa tlalnamijki, uan Jehová kichijki sampa ma tlanauati ipan Babilonia. Nabucodonosor kiijtok: “Nijueyichiua Jehová, katli tlanauatia ipan iluikak. Nama nijmati Jehová kinamiki tlanauatis. Uan kinpinaualtia katli moueyimatij uan san ya uelis kitekimakas katli ya kinekis”.