Esiku limwe omukwaniilwa Nebukadnezzar okwa yaguma ondjodhi ontilithi uusiku. Okwi ithana aanongo ayehe moshilongo she, opo ya fatulule shoka tayi ti. Mbela opwa li ngaa ngoka ta vulu oku yi mu fatululila? Aawe. Hugunina, omukwaniilwa okwa lombwele Daniel ondjodhi ye.

Nebukadnezzar okwa lombwele Daniel a ti: ‘Onda yaguma ndi wete omuti omuleeleka. Ogwa koko sigo gwa tsu mewangandjo. Ogwa li gu wetike kaantu ayehe muuyuni. Ogwa li gu na omafo go opala nogwa kakata iiyimati. Iiyamakuti oya gondjo momuzile gwagwo noondhila odha tungile iihandhila miitayi yagwo. Onda mono omuyengeli ta kuluka megulu. Okwi igidha a ti: “Kii po omuti, e tamu pompona ko iitayi yagwo. Ihe oshithindi shi thigii mo mevi sha mangwa nomalyenge giiyela iiluudhe niikushu. Uule womimvo heyali; ota kala kee na we uuntu meni lye, ihe ota ka kala a fa oshithitukuti. Aantu ayehe otaye ki ilonga kutya Kalunga oye Omupangeli nonokutya ota vulu okugandja uukwaniilwa kukehe ngoka a hala.”’

Jehova okwa hololele Daniel shoka ondjodhi tayi ti. Sho Daniel u uvu ko eityo lyondjodhi, okwa tila. Okwa ti: ‘Nkeyama, onda li nda hala andola ondjodhi yi kale tayi popi kombinga yaatondi yoye, ihe nani otayi popi kombinga yoye. Omuti omule ngoka gwa kewa po ongoye. Oto ka kuthwa uukwaniilwa woye noto ka lya omwiidhi melundu ngaashi oshiyamakuti. Ihe molwaashoka omuyengeli okwa ti kutya oshithindi nashi thigwe mevi pamwe nomidhi dhasho, oto ka ninga natango omukwaniilwa.’

Konima yoomwedhi omulongo nambali, omukwaniilwa Nebukadnezzar okwa li ta lyanga pombanda yongulumbala, ta tala nkene Babilonia sho opala. Okwa ti: ‘Taleni oshilando shika oshinene, Babilonia, shoka nda tunga. Taleni nkene ndi na oonkondo!’ Manga a li ta popi, oku uvu ewi lya zi megulu lya ti: ‘Nebukadnezzar! Uukwaniilwa woye oto wu kuthwa ngashingeyi.’

Pethimbo opo tuu mpono, Nebukadnezzar okwa yi oonkwengu nokwa ningi a fa oshiyamakuti. Okwa tidhwa mo mombala ye, e ta ka kala pamwe niiyamakuti miihwa. Omafufu ge oga ningi omale ga fa omalwenya gontsa, noonyala dhe odha li dha honga dha fa omakaha goondhila.

 Omimvo heyali sho dha piti po, Nebukadnezzar okwa galulilwa oondunge dhe, na Jehova okwe mu shunithile uukwaniilwa we. Okuza mpono Nebukadnezzar okwa ti: ‘Otandi hambelele Jehova, Omukwaniilwa gwomegulu. Ngashingeyi ondi shi kutya Jehova oye Omupangeli. Oha shonopeke aanuuntsa noha vulu okugandja uukwaniilwa kukehe ngoka a hala.’