Se yeuajli, Nabucodonosor okipix se temiktli tlen melak temojti. Okiminnots tlakamej akin tlamachilisejkej makitomilikan tlen okitemik. San ika, nion se xouel okitomili. Sakin, tekiuaj otlajto iuan Daniel.

Nabucodonosor okijli Daniel: “Ipan tlen oniktemik, onikitak ika se kojtli melak ouejkapantiak hasta oajsik iluikak. Nochiuiyan ueliyaj kitayaj. Ixiujyo melak kualtsin katka niman miyek itlakilyo kipiaya. Yolkamej noseuiayaj kampa itlaseuil niman totomej kichijchiuayaj intepasol ipan imauan. Sakin, se iluikaktekitketl ouajtemok itech iluikak niman otsajtsik: ‘Xtsontekikan yejon kojtli, niman xmatsotsontekikan. San ika, xkauakan ikojyo iuan ineluayouan. Xsalokan iyeualiyan ika hierro niman cobre. Iyojlo kojtli nopatlas. Xok kipiyas iyojlo se tlakatl, kipiyas iyojlo se yolki niman ijkon nokauas chikome xiuitl. Nochimej kimatiskej ika toTajtsin yejua Tekiuaj niman yejua ueli kimaka tekiuajyotl akin yejua kinekis’”.

Jehová okijli Daniel tlenon kijtosnekiya temiktli. Ijkuak Daniel okasikamat tlenon kijtosnekiya, melak onomojti. Yejua okijto: “Tekiuaj, niknekiskia ika tlen otiktemik inpan manochiua motlauelikniuan, san ika, tejua mopan nochiuas. Tejua yejon ueyi kojtli tlen okitsontejkej. Tikpolos motekiuajyo niman tijkuas xiujtli ijkon ken se yolki. San ika, iluikaktekitketl okijto ika makikauakan ikojyo iuan ineluayo. Yejon kijtosneki ika oksejpa titekiuajtis”.

Ijkuak opanok se xiuitl, Nabucodonosor nejnentinemiya ikuatipan ikal niman opeuj kita Babilonia. Yejua okijto: “Melak kualtsin ueyikalpan tlen yonikchijchiuj. ¡Xkita kenon melak niueyixtika!”. Ijkuak yejua tlajtotoya, se tlajtojli tlen ualeuaya iluikak okijli: “¡Nabucodonosor! Aman tikpoloua motekiuajyo”.

Ijkuakon, Nabucodonosor okipolo itlamachilis niman opeuj kichiua kentla se yolki. Okikixtijkej kampa chantiya niman ochantito imiuan yolkamej ipan tepetl. Itson melak oueueyakiyak ijkon ken ijuiyouan águila niman istiuan oueueyakiyakej ijkon ken istiuan tototl.

 Ijkuak yopanoka chikome xiuitl, Nabucodonosor oksejpa okajsik itlamachilis niman Jehová oksejpa okichiuj tekiuaj ipan Babilonia. Kuakon Nabucodonosor okijto: “Nikueyichiua Jehová, akin Tekiuaj ipan iluikak. Aman nikmati ika Jehová yejua akin Tekiuaj. Yejua kinpinaujtia akin noueyimatij, niman yejua ueli kimaka tekiuajyotl akin yejua kinekis”.