Samuza inötö me bongi, mangifi Nebukanesa fangifi sataʼu ia. Ikaoni zogonekhe ba gelemu ba wanutunö eluaha wangifinia. Hizaʼi, samösa lö sangila mamoʼeluaha. Ba gafuriata, ifatunö wangifinia andrö razo khö Danieli.

Imane razo khö Danieli, ’No uʼangifigö geu sebua. Alawa sibai geu daʼö irugi dalu mbanua si yawa ba oroma ba zi sagörö ulidanö. Baga sibai mbulu ba oya mbua. Molombase gurifö tou ba lumönia ba mangazuni wofo ba ndrahania. Aefa daʼö, tohare malaʼika moroi ba zorugo. Muʼao ia, ”Obö geu daʼö, ba ewa ndrahania. Hizaʼi, röi duhe awö waʼania tou ba danö. Böbö duhenia faoma siʼöli ba tembaga. Faböʼö dania dödö geu daʼö, moroi ba dödö niha tobali tödö gurifö, ba tehegö manö alua daʼö sagötö zi fitu fakhe. Aboto ba dödö niha fefu wa Lowalangi andrö Samatörö ba tola ifataro gofu haniha manö zomasi ia tobali razo.”’

Ifatunö Yehowa geluaha wangifi andrö khö Danieli ba izumaigö ataʼu Danieli imane, ’He Tuagu Razo, enaʼö na fangifimö andrö manandrösa ba zi faʼudu khöu, tenga yaʼugö. Yaʼugö samösa geu daʼö Tua, lö hadöi mamatörö ndraʼugö saʼae ba tobali ndraʼugö simane urifö, öʼa ndruʼu. Hizaʼi börö me iwaʼö malaʼika daʼö muböbö duhenia ba akha so manö ia ba daʼö, eluahania ifuli tobali ndraʼugö razo.’

Döfi aefa daʼö, manörö-nörö Nebukanesa ba dete zagö gödonia ba isuno-suno mbanua Mbabilona. Imane, ’Sahöli dödö mbanua nifazökhigu andre. Duhu wa pade sibai ndraʼo!’ Gasa-gasa wahuhuosania so li si terongo moroi ba zorugo, ’He Nebukanesa! Lö saʼae mamatörö ndraʼugö iadaʼa.’

Iʼanemaiʼö owöhö Nebukanesa ba ginötö daʼö yaʼi ba hulö gurifö. Lafofanö ia moroi ba gödonia ba toröi ia ba gotalua gurifö ba narö ndruʼu. Anau mbunia hulö mbu moyo ba saʼania hulö zaʼa wofo.

 Fitu fakhe aefa daʼö, ifuli mangawuli simane si toʼölö Nebukanesa ba ifuli tobali razo ia ba Mbabilona ibeʼe Yehowa. Aefa daʼö imane, ’Nisuno Yehowa Razo samatörö ba zorugo. Awena aboto ba dödögu iadaʼa wa Yehowa andrö Samatörö. Iʼailasi niha sasiliyawa ba tola ibeʼe wamatörö andrö gofu haʼökhö manö zomasi ia.’