Bošegong bjo bongwe, kgoši Nebukadinetsara o ile a lora toro ya go tšhoša. O ile a bitša banna ba gagwe ka moka ba bohlale gore ba tle ba mo hlalosetše toro yeo. Eupša ka moka ga bona ba ile ba palelwa ke go mo hlalosetša yona. Mafelelong, kgoši Nebukadinetsara a bolela le Daniele.

Nebukadinetsara o ile a re go Daniele: ‘Torong ya ka, ke bone sehlare. Sehlare seo se ile sa gola gomme sa fihla legodimong. Batho ba lefaseng ka moka ba be ba kgona go se bona. Se be se na le matlakala a mabotse e bile se na le dienywa tše dintši. Diphoofolo di be di dula moriting wa sona, gomme dinonyana di dula makaleng a sona. Ke moka morongwa yo mongwe a theoga legodimong, a fihla a goeletša a re: “Remang sehlare seo le se kgaoleng makala a sona. Eupša le šadiše kutu ya sona mmung e tlemilwe ka tšhipi le koporo. Pelo ya sehlare seo e ka se sa ba ya motho eupša e tla ba ya phoofolo, go be go fete mabaka a šupago. Batho ka moka ba tla tseba gore Modimo ke Mmuši le gore a ka kgetha motho le ge e le ofe gore e be kgoši.”’

Jehofa o ile a botša Daniele seo toro yeo e se bolelago. Ka morago ga gore Daniele a kwešiše toro yeo, o ile a tšhoga. O ile a re go kgoši Nebukadinetsara: ‘Mong wa ka, ke be ke duma gore seo se bolelwago ke toro ye se diragalele manaba a gago, eupša ka manyami, se tlo diragalela wena. Sehlare seo se segolo, seo se ilego sa rengwa, ke wena. O ka se sa ba kgoši, e bile o tlo dula nageng gomme wa ja bjang go swana le diphoofolo. Eupša ka ge morongwa a itše kutu ya sehlare seo e se ke ya rengwa, o tlo boela wa ba kgoši.’

Go ile gwa feta ngwaga Nebukadinetsara a lorile toro yeo. Ke moka ka letšatši le lengwe, o ile a itshepelela ka godimo ga ntlo ya gagwe, a tšama a reta naga ya gagwe ya Babilona. O ile a re: ‘Anke o bone Babilona e kgolo yeo ke e agilego ka matla a ka. Ga go na motho yo a mphalago!’ Ge a sa dutše a bolela, gwa kwagala lentšu leo le tšwago legodimong le re: ‘Nebukadinetsara! Ga o sa le kgoši.’

Ka yona nako yeo, Nebukadinetsara a gafa gomme a phela go swana le diphoofolo. O ile a rakwa legaeng la gagwe gomme a yo  phela le diphoofolo. Moriri wa gagwe e ile ya ba o motelele go swana le mafofa a ntšhu, gomme manala a gagwe a swana le a dinonyana.

Ka morago ga mengwaga e šupago, Nebukadinetsara o ile a fola gomme Jehofa a mo dira kgoši ya Babilona gape. Ke moka Nebukadinetsara a re: ‘Ke reta Jehofa, yena Kgoši ya magodimong. Gona bjale ke a tseba gore Jehofa ke Mmuši. O hloile bao ba ikgantšhago, e bile a ka dira gore motho le ge e le ofe yo a mo ratago e be kgoši.’