Nébukadnézzar nayiizyeelgo yikʼee násdzííd. Hastóí dahóyáanii áłah áyiilaago, baa neiséyeelígíí ááhyiłníinii bee shił dahołneʼ, yiłní. Ndi doo bídazhneelʼą́ą da. Daniel ałdóʼ yichʼįʼ haadzííʼ.

Kótʼéego Daniel yił hoolneʼ: ‘Tsin nineezígíí yótʼááh yíʼáago baa neiséyeel. Tʼáá ałtsodę́ę́ʼ yitʼı̨́. Bitʼąąʼ danizhóní. Bichahaʼohgi naaldlooshii naazhjééʼ, áádóó bitsʼádaozʼaʼ bąąhgi tsídii bitʼoh ádeileʼ. Diyingo naalʼaʼí łaʼ yáʼąąshdę́ę́ʼ adááyáago ání: “Tsin sikaadii kʼíníłneʼ áádóó bitsʼádaozʼaʼígíí híłneʼ. Nidi tsehégod dóó bikétłʼóól éí tʼáá łeeh yíʼáago ánílééh; béésh nitłʼizii índa béésh łitsoii bąąh siʼą́ągo ánílééh. Tsin kʼélneʼígíí bijéí éí diné bijéí nahalin, áko éí naaldlooshii bijéí bił aheełtʼéego tsostsʼid nídoohah. Tʼáá ałtso diné hoł béédahodoozįįł, God tʼéiyá Naatʼáanii nilı̨́ áádóó nahatʼaʼ yeididooʼáłígíí tʼáá bí tʼéí bee bóhólnííh.”ʼ

Nébukadnézzar nayiizyeel áhyiłníigi Jiihóvah éí Daniel yił ííshjání áyiilaa. Naatʼáanii nayiizyeelígíí bikʼizhʼdiitą́ągo Daniel níjísdzííd. Ájíní: ‘Naatʼáanii nílíinii, tʼáá ni ádaa neisíníyeel. Tsin ayóó áníłnééz kʼélneʼígíí éí ni ánítʼı̨́. Nahatʼaʼ naa náádidoolyééł áádóó naaldlooshii nahalingo tʼáá áhoodzaagóó tłʼoh niłchozh doo. Ákondi diyingo naalʼaʼí tsehégod dóó bikétłʼóól tʼáá ííʼáa doo nínę́ę bikʼehgo, naatʼáanii náá díídleeł.ʼ

Łaʼ nááhaigo, palace bighą́ą́ʼdę́ę́ʼ Bábilan kin haalʼáii jinéłʼı̨́įgo Nébukadnézzar ájíní: ‘Dooládóʼ kin haalʼáii tʼáadoo beełtʼéhígóó íishłaa da. Ayóó átʼéii nishłı̨́!ʼ Tʼáá yájíłtiʼgo, yáʼąąshdę́ę́ʼ iinééʼ diistsʼą́ąʼgo ání: ‘Nébukadnézzar! Nahatʼaʼ kʼad naa náádiilyá.ʼ

Tʼáá ákǫ́ǫ́ Nébukadnézzar tsiʼjideeyáago naaldlooshii nahojílin áádóó tłʼóoʼdi naaldlooshii bił nijildeeh. Hatsiiʼ éí ayóó áníłnéezgo atsʼá bitsʼos nahalin, háláshgaan éí tsídii biláshgaan nidahalin.

 Tsostsʼid nááhaigo, Nébukadnézzar diné níjísdlı̨́ı̨́ áádóó Bábilangi Jiihóvah éí naatʼáanii ánáhoodlaa. Ájíní: ‘Shí Nébukadnézzar yinishyéii yáʼąąshdi Naatʼáanii Jiihóvah baa hashniih. Tʼáá bí tʼéí Bóhólníihii nilı̨́. Ádaa deidzódlíi aʼohgo ádeileʼ. Tʼáá bí tʼéí nahatʼaʼ eidiyiiʼaah.ʼ