Motyinthiki tyimwe, Nambukondonosole aloto vali ondyoi imwe itilisa owoma. Aihana ovalume aveho ovanongo opo vahangunune ondyoi oyo. Mahi nawike wetyivilile. Konyima ohamba aikapopia na Daniele.

Nambukondonosole wapopila Daniele okuti: ‘Mondyoi yange namona omuti. Omuti waya unene peulu. Upondola okumoneka mouye auho. Wayova nawa tupu waima ovinyango ovinyingi. Ovinyama omo viombela iya oviila omo vitunga ovityiyu. Akuya oandyu yatunda keulu. Aiihanena peulu okuti: “Tyokei-po omuti ou iya amulombolola ovimpha viatyo. Mahi otyihingi tyatyo tyikutei notyivela. Omutima womuti oo mautyituka okutunda komunthu aukala wotyinyama momanima epandu-vali. Ovanthu aveho avelilongesila-ko okuti Huku oe omutimini iya wavela ouhamba omunthu ahanda.”’

Jeova wapopila Daniele oityi ondyoi oyo ihangununa. Etyi Daniele anoñgonoka etyi tyihangununa ondyoi, awele owoma. Apopi okuti: ‘Hamba, ankho ndyisoka okuti ondyoi ipopia onondyale mbove, mahi naina ipopia ove. Omuti omunene mautyokua-po ove yatyo. Ouhamba wove moupolwa iya okakala mohika nokulia eholi ngo tyinyama. Mahi ngetyi tyapopia oandyu okuti, seipo otyihingi tyatyo, ove mokondoka vali okukala ohamba.’

Etyi palamba enima like, Nambukondonosole ankho ukahi nokuenda-enda keulu liondyuo yae otyo atala Ombambilonia. Apopi okuti: ‘Tala epunda-umbo eli ewa ame natunga. Ame ndyihamba onene!’ Etyi apopia ngotyo, eivi ondaka yatunda peulu yati: ‘Nambukondonosole! Ouhamba pahe weupolua.’

Nambukondonosole avele komutwe iya akala ngo tyinyama. Moluotyo atundu meumbo akala mohika novinyama. Onohuki mba Nambukondonosole ambukala onondande ngo mainya onkhombe onohoka mbae ambukala ngo mbo viila.

 Etyi palamba omanima epandu-vali, Nambukondonosole akala nawa iya Jeova emuyeke akale ohamba Yombambilonia. Nambukondonosole ati: ‘Ame ndyihivilika Jeova, Ohamba yo keulu. Pahe ndyityii okuti Jeova Omutumini. Jeova ukondola koututu vana velipaka-ko iya waava ouhamba komunthu ahanda.’