Uj chʼisi, Nabucodonosorqa fierota mosqokorqa. Payqa yachayniyoj runasninta wajyarqa mosqoyninta sutʼinchanankupaj, nitaj sutʼinchayta aterqankuchu. Chayrayku reyqa Danielwan parlarqa.

Nabucodonosorqa Danielman nerqa: “Mosqoyniypi rikorqani uj jatun sachʼata. Chay sachʼaqa wiñaspa cielokama chayarqa. May karumantataj rikukoj. Laqhesnenqa may kʼachitus karqa, poqoynintaj may ashkha karqa. Animalespis llanthunpi llanthukoj kanku, pʼisqetustaj ramasninpi thapachakoj kanku. Chanta uj ángel cielomanta uraykamuspa nerqa: ‘Sachʼata urmachiychej, ramasninta kʼuturaychej. Jinapis kʼullunta saphisnintawanqa jallpʼapi saqeychej, fierro cadenawan cobre cadenawantaj wataykuychej. Sachʼaj sonqonqa niña runaj sonqon jinachu kanqa, manaqa uj phiña animalpa sonqon jina. Chantá qanchis watas pasanqa. Tukuytaj yachanqanku Jehová Dios kamachinanpaj atiyniyoj kasqanta, pimanchus gobiernota qoyta munan chaymantaj qoyta atisqanta’”, nispa.

Jehová Diosqa reypa mosqoyninta Danielman sutʼincharqa. Danieltaj chayta yachaspa mancharikorqa, nerqataj: “Ay wiraqochíy, enemigosnillaykitapis pasanman mosqoyniykipi rikusqaykeqa, jinapis qanta pasasonqa. Chay urmachisqanku sachʼaqa qanmin kanki. Manaña reychu kanki, phiña animal jinataj pastota mikhunki. Jinapis angelqa nerqa chay sachʼaj kʼullunta saphisnintawan saqenallankuta. Chaytaj niyta munan, watejmanta rey kanaykita”, nispa.

Uj wata qhepaman, Nabucodonosorqa kamachinan wasi patamanta Babiloniata qhawarisharqa, nerqataj: “Kay chhikan llajtata ruwani, ni pipis noqa jina kanchu” nispa. Ajinallapitaj cielomanta uj parlay nimorqa: “Nabucodonosor manaña reychu kanki”, nispa.

Nabucodonosorqa chayta uyariytawan locoyaporqa, uj phiña animalman jinataj tukorqa. Chayrayku payta kamachina wasinmanta qharqorqanku, phiña animaleswan khuskataj tiyarqa. Chujchanpis mayta wiñasqanrayku ankaj phurusnin jina karqa, sillusninpis pʼisqospata jina wiñaykorqa.

 Qanchis watasninman payqa sanoyaporqa. Jehová Diostaj payta Babiloniapi watejmanta reyta churarqa. Chantá Nabucodonosorqa nerqa: “Cielopi kaj Jehová Diosta jatunchani. Payqa jatunchakojkunata kʼumuykachachin. Kunan yachani Jehová Dioslla Gobernante kasqanta, pimanchus munan chayman uj gobiernota qoyta atisqanta ima”, nispa.