Shuj tutaca rey Nabucodonosorca shuj muscuitami charirca. Chaimi achcata mancharirca. Chai muscui ima nisha nishcata yachangapajmi yachaj runacunata cayarca. Pero ni maijan mana huillai tucurcacunachu. Chaimantami reyca Danielman parlarca.

Reyca cashnami nirca, ‘shuj yura cielocama huiñajtami ricurcani. Maimantapish ricunallami carca. Pꞌangacunaca sumajmi carca. Achca granotami charirca. Chai yura llandu ucupica animalcunami siricurcacuna. Ramacunapica pajarocunami tazinta rurarcacuna. Qꞌuipaca shuj ángel cielomanta uriyamushpami, “¡yurata urmachichij, ramacunatapish anchuchichij!, sapicunataca asha troncondij chaillapitaj saquichijlla. Fierrohuan broncehuan rurashca cadenacunahuan huatashpa saquichij. Chai yurapaj shunguca shujtajyangami. Ña mana runapaj shungu shinachu canga. Ashtahuanpish animal shina shungutami charinga. Canchis huatacamami chashna tucunga. Tucuicunami Dios Mandaj cashcata yachangacuna. Diosca pimanpish mandanataca cungallami” nishpami caparirca’ nircami.

Chai muscui ima nisha nishcata Jehová Dios huillajpimi Danielca mancharirca. Danielca Reymanca, ‘ñuca amito, can muscushcaca canta pꞌiñajcunapi pajtarijpichari alli canman. Pero canpimi pajtaringa. Pꞌitishca jatun yuraca canmi cangui. Mandaj canata saquishpami sacha animalcunahuan qꞌuihuata micushpa causangui. Ángel asha troncota sapicunandij chaillapitaj saquichijlla nishcaca can cutin mandanatami ricuchin’ nircami.

Shuj huata qꞌuipaca Nabucodonosorca mandana huasi jahuapimi puricurca. Babilonia llajtata ricushpami, ‘¡cai jatun llajtataca ñucami shayachircani! ¡Jatun mandajmi cani!’ nirca. Chashna yuyacujpimi cielomanta shuj rimashca uyarishpaca, ‘¡Nabucodonosor ña mana mandashpa catinguichu!’ nirca.

Chai ratomi Nabucodonosorca loco tucushpa sacha animal shina tucurca. Chaimi Mandana huasimanta llujshichishpa cachajpi animalcunahuan causanaman rirca. Paipaj ajchaca angapaj plumacuna shina tucungacamami huiñarca. Sillucunapish pajarocunapaj sillu shina tucungacamami huiñarca.

 Siete huatacuna qꞌuipaca Nabucodonosorca allimi tucurca. Jehová Diosca cutinmi Babiloniata mandachun saquirca. Chaimi reyca, ‘jahua pachapi caj Mandaj Jehová Diostami alabani. Pailla Jatun Mandaj cashcataca cunanmi yachani. Paica pimanpish mandanataca cungallami. Jatun tucushcacunatapish pingaipi churanllami’ nircami.