Juj tutan Nabucodonosorqa sinchi manchanata mosqokuran, jinan yachayniyoq runakunata wajachimuran mosqokusqanta explicanankupaq. Mana atiqtinkun Danielman willaran.

Reymi niran: “Mosqoyniypin rikurani jatun sach’ata, umanmi janaq pachakama chayaran, mundontinpi runakunataq rikuranku. Munay raphiyoqmi kasqa, askha ruruyoq, animalkunan llanthukuqku, phalaq animalkunapas q’esachakuqkun. Chay qhepamanmi juj angél niran: ‘Chay sach’ata kumpaychis, k’allmankunatapas wit’uychis. Ichaqa k’ulluntapas saphinkunatapas saqeychis fierro-bronce cadenawan watasqata. Yuyaynin cambiachun, jinaspa animal jina yuyayniyoq kachun, qanchis watantin chay jina kachun. Ancha jatun Diospa kamachikusqanta llapa runa yachananpaq. Payqa munasqan runamanmi kamachikuyta qon”’, nispa.

Diosmi Danielman willaran reypa mosqokusqanta jinan sinchita mancharikuran. Danielmi reyta niran: “Reyniy, allinchá kanman mosqokusqayki enemigoykikunawan pasaqtinqa, ichaqa qanwanmi pasanqa. Jatun sach’aqa qanmi kanki. Rey kasqaykimantan wijch’usunkiku, salqa animalkuna jinataq campopi qorata mijunki. Ichaqa angelmi willaran sach’aq k’ullunpas saphinpas kashanallanta, chaywanmi nisharan wajmanta rey kanaykita”, nispa.

Juj wata qhepamanmi Nabucodonosorqa palacionpa techonmanta Babilonia llaqtata qhawarispa sonqonpi niran: “¡May sumaq llaqtatan jatarichisqani, manan pipas noqa jinaqa kanchu!”, nispa. Chay ratopin Diospa angelnin payta niran: “¡Nabucodonosor! Rey kasqaykimantan wijch’usunkiku”, nispa.

Chay ratopin Nabucodonosorqa locoyapuran, jinan rey kasqanmanta orqoranku jinaspa animalkunawan kuska tiyaran, paykuna jinataq q’achuta mijuran. Chujchanpas phalaq animalkunaq rafran jina jatunta wiñaran, sillunkunapas phalaq animalkunaq sillun jina jatunta wiñaran.

 Qanchis watamantan Nabucodonosorqa yuyayninman kutiran, jinan Diosqa wajmanta churaran Babiloniapi rey kananpaq. Chaymi Nabucodonosorqa niran: “Jehová Diostan jatunchani, kunanqa yachanin jatun kamachikuq kasqanta. Paymi jatunchakuqkunata k’umuykachin, munasqan runatataq rey kananpaq churan”, nispa.