Shuj tutaca Nabucodonosorca shuj muscuita muscushpami ninanda manllarirca. Chaimi “Babilonia llactapi causaj tucui alipacha yachajushcacunata” chai muscui ima cashcata villachun cayarca. Paicunapuramandaca ni maijan chai muscui ima cajtaca na villai usharcachu. Chaimandami rey Nabucodonosorca Danielhuan parlarca.

Nabucodonosorca Danieltaca nircami: Muscuipica shuj quirutami ricurcani. ‘Chai quiru pundaca jahua pachacamanmi viñarca. Chaitaca, tucui cai pachamandami maimandapash ricunalla carca. Granocunapash ninanda fucujujta, fanga junda, juyailla cajtami ricurcani. Tucui animalcunapash, chai quiru ucupimi, llandushpa sirinajurca. Jahuata rij alasyu animalcunapash, chai quirupimi causanajurca’. Chai jipaca shuj angelmi ‘jahua pachamanda urai shamurca. Paica, cashnami caparijurca: Chai quiruta urmachishpa malquicunatapash fitichi. Ashtahuangarin troncotaca sapicunandi saquichilla. Chaitaca, jirru cadenahuan, bronce cadenahuan huatashpa saquichi. Paipa shungutapash, runapa shungupa randica, animalpa shungutashna cuchun. Canchis huatacaman chashna causachun’. Tucui gentecunami Taita Dios Tucuita Mandaj cajta, piman cungapaj munashpapash mandanataca cujlla cashcata yachanga.

Jehová Diosca chai muscui ima cashcatami Danielmanga intindichirca. Chai muscui ima cashcata intindishpami Danielca manllarishpa cashna nirca: “Ñucata mandajlla, cambaj muscuica canda fiñajcunapaj cashpami ali canman”. Muscuipi ricushcacunaca canbimi pactarigrijun. Chai fitishca jatun quiruca canmi cangui. Can mandajushcata quichujpimi, pamba animalcuna shina jihuata micushpa causangui. Shinallata shuj angelca ‘troncotaca sapicunandi chaipillata saquichun mandajtami ricurcangui. Chaica, can mandajushca llactataca, canllata cutin japinatami’ ricuchijun nishpa.

Shuj huata jipaca Nabucodonosorca paipa huasipimi caiman chaiman purijurca. Shina purijushpami Babilonia llactata ricushpa cashna nirca: “Cai jatun Babilonia pueblotaca, ¿nachu ñuca rurachircani?”. Ñucaca tucuitami ali yachani nishpa. Shina nijujpillatami “jahua pachamanda cashna nij uyarirca, jatun mandaj Nabucodonosor can mandana llactataca, ña quichui tucurcanguimi” nishpa.

Shina nijhuanmi Nabucodonosorca loco tucushpa sacha animal cuenda tucurca. Chaimi pai mandana huasimanda Ilujchishpa shitajpi animalcunahuan causana tucurca. ‘Paipa tucui aichapimi jatun angapaj plumashna milmacuna viñarca. Sillucunapash, alasyu animalcunapa sillucunashnami tucurca’.

 Canchis huatacuna yalishca jipaca Nabucodonosor ali tucujpimi Jehová Diosca cutin Babilonia llactata mandachun churarca. Chaimi Nabucodonosorca cashna nirca: ‘Cunanga, jahua pachata Jatun Mandajtami alicachishpa jatunyachini’. ‘Paica, jariyashpa jatun tucujcunatapash urai cumuchi ushanllami’. Cunanga Jehová Dios Tucuita Mandaj cajta, piman cungapaj munashpapash mandanataca cujlla cashcatami ali yachani nishpa.