Jekh rat, o Navuhodonosor hine lje strašno suno. Odoljese vičindža sa e mudra manušen te vačeren ljese so značini o suno. Ama, niko naštindža te objasnini lje. Ko krajo, o kralj vačerdža e Daniloja.

O Navuhodonosor phendža e Danilose: „Ko suno dikhljum jekh kaš. Barilo odobor but, so reslja dži o nebo. Šaj hine te dikhel pe ando svako than ki phuv. Hine lje šuže listija hem but plodija. O životinje hine odmorinena pe talji oljesi senka hem o čiriklja čerdže gnezdo ko oljese grane. Tegani jekh anđeo huljilo ando nebo. Ov phendža: ’Čhinen o kaš hem oljese granke. Ama, mukhen o stablo e korenoncar hem okolo ljeste čhiven sastronalje hem bakarna okovija. Nek oljeso vilo menjini pe ando manušikano ko životinjsko hem odova ka trajini efta vremenija. Sa o manuša ka dikhen so o Devel tano Vladari hem so ov dela o kraljevstvo kase mangela.‘“

O Jehova mothovdža e Danilose so značini o suno. Ked o Danilo haljilo so značini o suno, but darandilo. Ov phendža e kraljose: „Pošukar akava suno te ovel te dušmanendže, ama, akava tano tuče. O baro kaš so hine čhindo, tu hijan. Ka našalje o kraljevstvo hem ka ha čar ko njive sar divljo životinja. Ama, odova so phendža o anđeo te mukhel pe o stablo e korenoncar značini so paljem ka ove kralj.“

Palo jekh berš, o Navuhodonosor phirdža ko ravno krov ki piklji palata hem dikhlja kobor tano šužo o Vavilon. Ov phendža: „Kobor šuži diz gradindžum! Čače hijum but važno manuš!“ Dži vačerdža, jekh glaso ando nebo phendža ljese: „Navuhodonosor! Akana o kraljevstvo nane više toklo.“

Ko odova trenutko, o Navuhodonosor našaldža pi godi hem ulo sar divljo životinja. Morandilo te džal andi palata hem te živini e divljo životinjencar. Oljese bala barilje sar o perje ando orao, a oljese noktija sar e čirikljenge kandže.

 Ked nakhlje efta berš, o Navuhodonosor ulo paljem normalno hem o Jehova čerdža lje te ovel kralj ko Vavilon. O Navuhodonosor phendža: „Hvalinava e Jehova, e Kraljo ando nebo. Akana džanava so o Jehova tano Vladari. Sikavi e ponosno manušen te oven ponizna hem čhivela te ovel kralj okolje kas ov mangela.“