Ntsiku inango namasiku, Nabhukodhonozore agopa kakamwe thangwi ya pidalota iye. Iye acemeresa amuna audziwisi toera ampange mabvekero a ndoto yace. Mbwenye nee m’bodzi adakwanisa kuifokotoza. Pakumalisira, mambo apanga Dhanyeli.

Nabhukodhonozore apanga Dhanyeli: Mu ndoto yanga, ndaona muti. Iwo ukhali wakulapha mpaka kufika kudzulu. Iwo mbudaoneka na kutali kakamwe. Iwo ukhali na masamba akubalika na misapo mizinji. Pinyama pikhagona pa n’thundzi wace, pontho mbalame zikhamanga ntsandza mu nthawi za muti unoyu. Buluka penepo, anju atcitha kubuluka kudzulu. Iye akhuwa: ‘Gwisani muti uyu, pontho gwandani nthawi zace. Mbwenye pfuli na mitcitci yace pisiyeni, pontho mangani pfuli na bhande ya utale na ya safuli. Ntima wa muti unadzacinja kubuluka wa munthu mbukhala wa cinyama mpaka kumala midzidzi minomwe. Anthu onsene anadzadziwa kuti Mulungu ndi Ntongi, pontho anapasa umambo kuna munthu anafuna iye.’

Yahova apanga Dhanyeli mabvekero a ndoto ineyi. Dhanyeli agopa kakamwe pidadziwa iye mabvekero ace. Iye alonga: ‘Mambo, ndikhanyerezera kuti ndoto iyi ikhalonga pya anyamalwa anu, mbwenye si pyenepi tayu. Iyo isalonga pya imwe. Muti ukulu udagwandwa ndimwe. Munakwatirwa umambo, buluka penepo, munadzadya tsanga ninga cinyama ca ntsanga. Nakuti anju alonga toera kusiya pfuli na mitcitci yace, kutsogolo munadzakhala pontho mambo.’

Caka cidatowera, Nabhukodhonozore akhali pa ntsoi ya nyumba ya umambo, mbakakomerwa na nzinda wa Bhabhilonya. Iye alonga: ‘Onani basi kubalika kwa nzinda udamanga ine. Ndine mambo wankulu kupiringana onsene!’ Mu ndzidzi ukhalonga iye, abva fala yakubuluka kudzulu, mbilonga: ‘Nabhukodhonozore! Cincino unakwatirwa umambo wako.’

Mu ndzidzi unoyu, Nabhukodhonozore adzakhala nyansala, mbatoma kudya tsanga ninga cinyama. Iye abuluka panyumba mbaenda kakhala ntsanga na pinyama. Tsisi ya Nabhukodhonozore yadzakula mbikhala ninga manthenga a mbalame inacemerwa  nkhwazi, pontho ngole zace zadzakhala ninga za mbalame.

Mudamala pyaka pinomwe, Nabhukodhonozore adzakhala pontho mwadidi, Yahova amuikha pontho ninga mambo. Buluka penepo, Nabhukodhonozore alonga: ‘Mbasimbwe Yahova, Mambo wakudzulu. Cincino ndisadziwa kuti Yahova ndi Ntongi. Iye asacepesa anthu akudzikuza, pontho asapasa umambo kuna ule anafuna iye.’