Na mbeni bï, Nébucadnezzar abâ mbeni bango li so asara zo mbeto. Lo iri azo ti lo so ayeke na ndara ti ga ti fa na lo nda ti bango li ni. Me zo oko ti fa ndani na lo ayeke dä ape. Na nda ni, gbia ni asara tënë ni na Daniel.

Nébucadnezzar atene na Daniel: ‘Na yâ ti bango li ni, mbi bâ mbeni keke. A yo na nduzu ngbii juska a ye ti kpo lê ti nduzu. Zo kue na ndö ti sese apeut ti bâ ni atâa lo yeke na ndo wa. Akugbe ni ayeke pendere nga alengo ni ayeke dä gbani. Anyama aga ti duti na gbe ti dê ni, andeke asara da ti ala na ndö ti amaboko ni. Mo ye ti bâ, mbeni ange alondo na yayu aga. Lo dekongo, lo tene: “Ala dë keke ni na sese, na ala dë amaboko ni. Me ala zia kota gere ni nga na gunda ni angbâ na yâ ti sese, na ala kanga ni na wen nga na cuivre. Bê ti lo ti zo ayeke changé ti ga bê ti nyama ti ngonda juska ngu mbasambala ahon si. Azo kue ayeke hinga so Nzapa la ayeke Gbia na lo yeke mû royaume ni na zo so lo ye ti mû ni na lo.”’

Jéhovah afa nda ti bango li ni na Daniel. Na ngoi so Daniel ahinga nda ti bango li ni, mbeto asara lo. Lo tene: ‘Gbia, mbi ye fade ti tene bango li ni aduti ndali ti awato ti mo, me a yeke ndali ti mo. Kota keke ni so si a dë ni na sese so ayeke mo. Mo yeke perdre ande royaume ti mo, na mo yeke gue ti te pere tongana ti so anyama ti ngonda ayeke sara ka. Me so ange ni atene a yeke dë kota gere ti keke ni ape so, a ye ti tene so mo yeke kiri ande ti ga gbia.’

Ngu oko na pekoni, Nébucadnezzar ayeke tambela na ndö ti yangbo ti lo ti gbia, lo gonda pendere ti Babylone. Lo tene: ‘Bâ tâ pendere gbata so mbi sara so ma! Tâ mbi yeke kota mingi-ein!’ Na ngoi so lo ngbâ ti sara tënë, mbeni go asara tënë na yayu, atene: ‘Nébucadnezzar! Fadeso a zi royaume ti mo na maboko ti mo awe.’

Gï na lê ni lê, Nébucadnezzar agirisa terê ti lo lo komanse ti sara ye kirikiri na lo sara ye tongana mbeni nyama ti ngonda. A tomba lo na yâ ti yangbo ti lo ti gbia na lo gue lo sara kodro na popo ti anyama ti ngonda. Kuä ti li ti Nébucadnezzar ayo tongana kuä ti terê ti aigle nga  ongle ti maboko ti lo na ti gere ti lo ayo tongana ti andeke.

Tongana ngu mbasambala ahon awe, li ti Nébucadnezzar akiri dä na Jéhovah asara si lo kiri lo ga gbia ti Babylone. Nébucadnezzar angbâ atene: ‘Mbi sepela Jéhovah, Gbia ti yayu. Mbi hinga so Jéhovah la ayeke Gbia. Lo zia kamene na lê ti azo so asara ye na baba, na lo lingbi ti mû royaume na zo so bê ti lo aye.’