Nampatahotsy ty nofini-Nebokadnezara tamy haly raiky zay. Nikaihiny olo hendry rey mba hanambara ty dikani-raha iny. Fe tsy nihain-drozy iaby ty nanazava nofiny iny. Farany nivolanini-mpanjaka tamy Daniela raha iny.

Hoy ty asany: ‘Tamy nofiko zay, nahita hazo mitiry aho. Abo biby zisiky an-danitsy any hazo iny, ka afaky nahita azy iaby ty olo ambony tany etoy. Soasoa ty raviny sady maro biby ty voany. Nialokaloky aminy ty biby, le namboatsy trano amy tahony eny ty voro. Bakeo, nijotso baka an-danitsy any anjely raiky zay. Hoy ty asany: “Tampaho any hazo ’o, le rantsano ty tahony. Fe engao eo avao ty fotony noho ty vahatsiny, le rohizo vy noho saba. Tsy ho fon’olombelo sasy ty fony fa hanjary fom-biby, le hanahaky ani-zay avao ie anatini-fotoa fito. Ho hain’olo iaby amy zay fa Ndranahary ro Mpanday, sady azony amea fanjakà ze teany hamea.”’

Nambarani-Jehovah ani-Daniela ty dikani-nofy iny. Lafa nihainy raha iny, le natahotsy ie. Nivola ie hoe: ‘Nao lahy mpanjaka! Ho nisoa laha nanonofy mikasiky ty fahavalonao iha fa tsy mikasiky anao. Tsy ia moa hazo nitampahy iny fa iha. Tsy ho mpanjaka iha, le hihina akata an-tonda eny manahaky bibinala io. Fe mbo ho mpanjaka avao ndraiky iha, satria nivola anjely iny fa hengà eo ty fotoni-hazo iny noho ty vahatsiny.’

Tao raiky tafarani-zay, le nandehandeha anabo tranony ao Nebokadnezara, sady nanenty ani-Babylona. Nivola ie hoe: ‘Soa aloha tanà namboariko toy. Tsy misy manahaky ahy vatany!’ Lafa nivola ani-zay ie, le nisy feo nanao ho zao baka an-danitsy any: ‘Nebokadnezara! Fa tsy mpanjaka sasy iha.’

Tonga de nivaliky adala Nebokadnezara ka nanjary manahaky bibinala io. Niroasy baka an-tranony ao ie, le niaraky nipetraky amy bibinala an-tonda any rey. Nanjary lava manahaky voloni-voromahery io ty volondohany, le nanahaky hohoni-voro rey ty hohony.

Fito tao tafarani-zay, le tsy nanahy sasy Nebokadnezara ka nataoni-Jehovah mpanjakani-Babylona ndraiky. Nivola amy zay  Nebokadnezara hoe: ‘Midera ani-Jehovah Mpanjakani-lanitsy aho. Haiko henanizay fa Jehovah ro Mpanday. Mampijetsy ty olo mirengirengy ie, sady azony amea fanjakà ze teany hamea.’